"Барселона" футболчиси Ламин Ямал 18 ёшли клубдоши Ҳамза Абдулкаримнинг келажаги ҳақида фикр билдирди.

Каталония клуби ёзда ёш мисрлик футболчини Қоҳиранинг "Ал-Аҳли" клубидан сотиб олган эди. Ханс-Дитер Флик ҳозирча истиқболли ҳужумчига расмий ўйинларда кўп имконият бермаяпти, аммо унинг мавсумолди учрашувларидаги ҳаракатларидан мамнун қолган.

— Абдулкарим Муҳаммад Салоҳнинг йўлини такрорлай оладими?

— "Салоҳ — буюк футболчи, Премьер-лига тарихидаги энг машҳур африкалик юлдузлардан бири. Ҳозирча бундай таққослашлар учун эрта. Ҳамзанинг қандай ривожланишини кўрамиз.

У муваффақиятга эришиш ва Миср футболи тарихида ўз номини қолдириш учун керакли сифатларга эга. Умид қиламанки, бунинг уддасидан чиқади", — деди Ямаль журналист саволига жавобан.

Абдулкарим "Барселона" асосий жамоаси сафидаги дебютини 1 сентябрь куни Ла Лига доирасида "Райо Вальекано"га қарши ўйинда ўтказган.