Португалия терма жамоаси тарихидаги энг катта 10 та можаронинг тўрттасида ҳужумчи Криштиану Роналду иштирок этган.
"Ан-Наср"нинг 41 ёшли ҳужумчиси кеча бош мураббий Жорже Жезуш билан юзага келган келишмовчилик сабаб миллий терма жамоа қароргоҳини тарк этди.
Португалиянинг кундалик спорт нашри A Bola кечаги воқеадан ташқари, мамлакат терма жамоаси тарихидаги энг катта 10 та можаро рўйхатини тузди.
-
ЖЧ-2022 доирасида Жанубий Кореяга қарши ўйинда (1:2) бош мураббий Фернанду Сантуш Роналдуни 66-дақиқада алмаштирди. Майдонни тарк этаётган футболчи: "У мени тезроқ майдондан чиқаришни жуда хоҳлаяпти", деди. Учрашувдан кейин Сантуш ҳужумчининг хатти-ҳаракатлари ҳақида: "Бу менга умуман ёқмади", дея фикр билдирди. Кейинги Швейцарияга қарши ўйинда асосий таркибда Гонсалу Рамуш майдонга тушди ва хет-трик қайд этди. Португалия 6:1 ҳисобида ғалаба қозонди.
-
ЖЧ-2022 саралаш босқичида Сербияга қарши учрашувда Роналду гол урди, аммо ҳакам тўп дарвоза чизиғини тўлиқ кесиб ўтмаган деб ҳисоблади. Ўйинда VAR тизими бўлмагани учун қарор ўзгаришсиз қолди. Бундан қаттиқ ғазабланган Криштиану сардорлик боғичини ерга улоқтирди.
-
Евро-2016 вақтида Роналду CMTV телеканали журналистининг қўлидан микрофонни тортиб олиб, уни кўлга улоқтирган видео ижтимоий тармоқларда жуда оммалашди. Ҳодиса Венгрияга қарши ўйин куни терма жамоа футболчилари сайрга чиққан пайтда содир бўлган.
-
Карлуш Кейруш бошқарган Португалия терма жамоаси ЖЧ-2010 нимчорак финалида Испанияга 0:1 ҳисобида ютқазиб, мусобақани тарк этди. Ўйиндан кейин микст-зонада Роналдудан мағлубият сабабини тушунтириш сўралганда, у: "Мен тушунтиришимни хоҳлайсизми? Карлуш Кейруш билан гаплашинг", деб жавоб берди.
-
Ҳимоячи Рикарду Карвалью 2011 йилда бош мураббий Паулу Бенту унинг ўрнига Бруну Алвешни асосий таркибда майдонга туширишга қарор қилгач, Португалия терма жамоаси йиғинини тарк этди. Карвалью ўз хоҳиши билан кетган, аммо кейинчалик бу қароридан афсусланган.
-
2009 йилда Сержиу Консейсау Португалия футбол федерациясининг собиқ президенти Жилберту Мадаилни кескин танқид қилган: "Доктор Ахлатмадаил 2002 йилги жаҳон чемпионатидаги фожеадан кейин жаҳон чемпиони Сколарининг ортига яширинди".
-
Португалия Евро-2008 саралаш босқичида Сербия билан 1:1 ҳисобида дуранг ўйнади. Учрашувдан кейин бош мураббий Луис Фелипе Сколари сербиялик футболчи Ивица Драгутиновични уришга уринди. Кейинчалик мураббий бу ҳаракатини "Рикарду Куарежмани ҳимоя қилиш" учун қилганини айтди.
-
Даниэл Кенеди ЖЧ-2002 арафасида Португалия терма жамоаси билан Макаода машғулот ўтаётган эди. Аммо допинг-синови ижобий натижа бергач, у Португалияга қайтишга мажбур бўлди.
-
1997 йилда Рикарду Са Пинту Шимолий Ирландияга қарши ўйин учун таркибга киритилмаганидан сўнг, миллий терма жамоа машғулот ўтказадиган "Жамор" стадионида бош мураббий Артур Жоржени урди.
-
1986 йилги жаҳон чемпионати вақтида Португалия терма жамоаси футболчилари йиғиндаги ёмон шароитлар сабаб исён кўтаришди. У ерда футболчилар учун шахсий ҳудуд деярли йўқ эди, машғулот майдони эса қия ҳолатда бўлган.
