Ҳуқуқлари «Тихуана» клубига тегишли бўлган мексикалик вингер Хильберто Мора Европа клублари орасида катта қизиқиш уйғотмоқда.

Экрем Конурнинг ижтимоий тармоқлардаги маълумотига кўра, 17 ёшли футболчи Мадриднинг «Реал», «Манчестер Юнайтед», «Ливерпуль», «Аякс», «Бавария», «ПСЖ» ва Дортмунднинг «Боруссия» клублари эътиборини тортган.

Ҳужумкор ярим ҳимоячининг «Тихуана» билан амалдаги шартномаси 2029 йил июнь ойи охирига қадар мўлжалланган. Футболчининг бозор қиймати 25 миллион еврога баҳоланмоқда.

Мора жорий Мексика чемпионатида еттита учрашув ўтказиб, бешта гол урди ва битта голли узатмани амалга оширди.