Англия Премьер-лигаси клублари «Манчестер Сити»га нисбатан бир мавсумга Чемпионшипга туширишдан ҳам оғирроқ жазо қўлланилишини талаб қилмоқда.

Мустақил комиссия клубни 2009 йилдан 2018 йилгача бўлган даврда даромадларини 900 миллион фунтга ошириб кўрсатишга хизмат қилган «яширин молиялаштириш схемаси»да айбдор деб топган.

«Бир мавсумга Чемпионшипга тушириш етарли бўлмайди. Комиссия йиллар давомида мунтазам ва атайлаб амалга оширилган қоидабузарликларга мутаносиб жазо белгилаши, шунингдек, бундай ҳолатнинг келажакда такрорланишига кучли тўсиқ яратиши керак», — деди клублардан биридаги манба The Guardian нашрига.

«Манчестер Сити»нинг апелляцияси кўриб чиқилгандан кейин санкциялар бўйича алоҳида эшитув ўтказилиши кутилмоқда. Қарор январь ойи охиригача чиқарилиши мумкин. Бироқ «Сити» Премьер-лига белгилаган тезлаштирилган жараёнга қарши чиқса, иш яна чўзилиши эҳтимоли бор.

«Манчестер Юнайтед», «Арсенал», «Тоттенхэм» ва «Ливерпуль» эҳтимолий зарарлар юзасидан «Манчестер Сити»га қарши судга мурожаат қилиш ҳуқуқини сақлаб қолган.

Бу борада «Бёрнли»нинг «Эвертон» устидан PSR молиявий қоидаларини бузгани учун 35 миллион фунт компенсация ундиргани прецедент сифатида кўрсатилмоқда.

«Манчестер Сити» эса ўзини айбсиз деб ҳисоблашда давом этмоқда ва қарор устидан тўлиқ апелляция беришни режалаштирган.