«Реал» ҳимоячиси Рауль Асенсио ўнг болдир суяги синиши сабабли муваффақиятли операция қилинди. Жарроҳлик амалиёти Мадрид клубининг тиббий штаби назорати остида ўтказилди. Яқин кунларда футболчи тикланиш жараёнини бошлайди. Бу ҳақда «Қироллик клуби»нинг расмий сайти хабар берди.

Аввалроқ Асенсионинг жароҳати жорий йил январидан буён, яъни тўққиз ой давомида безовта қилаётгани хабар қилинган эди. Терма жамоалар ўйинлари учун берилган уч ҳафталик танаффус вақтида ҳимоячи жароҳатидан халос бўлишга сўнгги бор уриниб кўрди, аммо консерватив даволаш ва тикланиш жараёнини тезлаштириш кутилган натижани бермади.

Рауль Асенсио 2024 йил июль ойидан буён «Реал» сафида ўйнаб келмоқда. Ҳимоячи «қаймоқранглилар» билан шартномасини 2031 йилга қадар узайтирган.