«Вильярреал» дарвозабони Петер Гулачи халқаро танаффусдан кейин «Сантьяго Бернабеу»да «Реал»га қарши ўтадиган Ла Лига учрашуви ҳақида фикр билдирди.

«Мен у ерда икки марта ўйнаганман. «Лейпциг» билан бир марта мағлуб бўлганмиз ва бир марта дуранг ўйнаганмиз. Энди илк ғалабамни қўлга киритишни истайман. Яхши натижага умид қиляпмиз.

«Бернабеу»даги ўйиндан кейин бизни жуда қийин учрашувлар кутяпти, бундан ташқари, Чемпионлар лигасига ҳам эътибор қаратишимиз керак. Биз муваффақиятга эришишимиз шарт, аммо ҳозир биринчи навбатда «Реал» ҳақида ўйлаяпмиз.

Биз жуда кучли жамоага қарши майдонга тушамиз. Бу жуда қийин бўлади. Барча кучимизни берамиз ва ажойиб натижага эришишга ҳаракат қиламиз.

Биз «қуруқ» ўйинлар сонини кўпайтиришимиз керак. Бу устида ишлаётган жиҳатларимиздан бири ва биз учун устувор вазифа.

Дарвозабон сифатида гол ўтказмасдан ўйинни якунлай олмаслик алам қилади. Биз янада ишончли ҳаракат қилишимиз керак. Сўнгги икки ўйинда гол ўтказдик, аммо ўйинимиз яхшиланди.

Биз янада барқарор жамоага айландик. Айнан шуни хоҳлаяпмиз», — деди венгриялик футболчи.

Ёзда «РБ Лейпциг»даги ўн йиллик фаолиятидан сўнг «Ла Серамика»га кўчиб ўтган Гулачи «Вильярреал»нинг савиясини ҳам юқори баҳолади.

«Жамоанинг сифати мени жуда ҳайратда қолдирди. Мен таққослаш учун яхши имкониятга эгаман, чунки Германиянинг учинчи энг кучли жамоасидан Испаниянинг учинчи энг кучли жамоасига келдим.

Бу ажойиб жамоа. Унинг шиддати ва сифати менда катта таассурот қолдирди. Айрим ўйинларда биз кўпроқ очко олишга ҳақли эдик.

Биз ўсишда давом этяпмиз ва шунга эришиш учун ишлаяпмиз. Йўналиш ижобий ва шу тарзда давом этишимиз керак», — дея қўшимча қилди Гулачи.