«Манчестер Юнайтед»нинг собиқ ярим ҳимоячиси Фред Эрик тен Хагни танқид қилиб, унинг жамоадаги фаолияти ҳақида гапирди.

«Тактик жиҳатдан тен Хаг ажойиб мураббий эди, мен бирга ишлаган энг яхши мутахассислардан бири. Аммо жамоани бошқариш борасида у ҳақиқий фалокат эди. У ҳамма билан жанжаллашарди: мен билан ҳам, Криштиану, Каземиро ва Рэшфорд билан ҳам», — деди Фред Charla подкастида.

«У мени ўйинларда майдонга туширмасди ва баъзида жамоадаги муҳит жуда таранг бўларди. Тен Хаг даврида нидерландиялик футболчилар кўпроқ ўйин вақтига эга бўларди. У жамоа ичида алоҳида гуруҳлар пайдо қиладиган мураббий эди».

Фред, шунингдек, мураббийнинг Криштиану Роналду билан можароси ҳақида ҳам гапирди:

«У жамоанинг тезкор футбол ўйнашини хоҳларди, аммо Криштиану ёши ўтиб бораётган эди. Шу сабаб тен Хаг уни асосий таркибдан чиқарди ва улар ўртасида можаро келиб чиқди».

Эрик тен Хаг 2022 йил апрелидан 2024 йил 28 октябрга қадар «Манчестер Юнайтед» бош мураббийи сифатида ишлади. У шу давр мобайнида клуб билан иккита соврин — Англия Лига кубоги ва Англия кубогини қўлга киритди. Тен Хагнинг илк мавсумида «Манчестер Юнайтед» Англия Премьер-лигасини учинчи ўринда якунлаган эди.