Норвегия терма жамоаси бош мураббийи Столе Сольбаккен Миллатлар лигасида Португалияга қарши ўйинда Эрлинг Холанд нега алмаштирилганини тушунтирди.
Тўртинчи тур доирасидаги учрашувда Холанд асосий таркибда майдонга тушди, аммо 67-дақиқада алмаштирилди. Дастлаб норвегиялик ҳужумчи жароҳат олгани тахмин қилинган эди.
"Биз Холанд ва яна беш-олти нафар футболчи билан шундай келишиб олган эдик: улар ўзларини 100 фоиз куч билан ўйнай олмайдиган ҳолатда ҳис қилса, алмаштирамиз. Тахминан 60-дақиқаларда алмаштириш ҳақида гаплашган эдик ва Холанд буни биларди.
Якунда у режалаштирилганидан бироз кўпроқ ўйнади ва ўзини жуда яхши кўрсатди", — деди Сольбаккен матбуот анжуманида.
Тўрт турдан кейин Норвегия терма жамоаси уч очко билан тўртинчи гуруҳ турнир жадвалида сўнгги ўринни эгаллаб турибди.
