Мадриднинг "Реал" клуби ярим ҳимоячиси Арда Гюлер Transfermarkt портали футболчиларнинг бозор қийматини янгилаганидан сўнг 100 миллион евролик кўрсаткичга етди.
21 ёшли футболчининг нархи 10 миллион еврога ошди ва у тарихда бозор қиймати 100 миллион еврога етган биринчи туркиялик футболчига айланди.
Гюлер "Реал" сафида мавсумни муваффақиятли бошлагани учун юқори баҳоланди. У 7 та учрашувда 4 та самарали ҳаракатни ўз ҳисобига ёздирди.
2023 йилда "Фенербахче"дан Мадрид клубига ўтганидан бери ярим ҳимоячининг бозор қиймати қарийб 7 бараварга ошди — 15 миллион евродан 100 миллион еврогача.
Тарихдаги энг қиммат туркиялик футболчилар рўйхатида иккинчи ўринни "Ювентус" вингери Кенан Йилдиз эгаллаб турибди. Унинг бозор қиймати 75 миллион еврога баҳоланган.
"Айнтрахт" футболчиси Жан Узун эса 45 миллион евролик кўрсаткич билан Ҳакан Чалҳанўғли ва Чағлар Сўюнджю билан биргаликда учинчи ўринни бўлишиб турибди. Чалҳанўғли 2024 йилда "Интер" сафида, Сўюнджю эса ундан уч йил аввал "Лестер"да ўйнаган пайтида 45 миллион евролик қийматга етган.
