«Милан» ва Хорватия терма жамоаси ярим ҳимоячиси Лука Модрич Мадриднинг «Реал» клубига қайтиш истаги борлигини яна бир бор маълум қилди.

41 ёшли футболчи, табиийки, «қироллик клуби»га ўйинчи сифатида эмас, балки футболчилик фаолиятини якунлаганидан кейин бошқа вазифада қайтишни режалаштирмоқда.

«Мен «Реал»га қайтишни истардим, аммо клубга фойда келтиришни хоҳлайман. Яъни «Реал»да эмас, «Реал» учун ишлашни истайман. Бу амалга ошиши учун кўп нарсалар бир-бирига мос келиши керак», — дея Модричнинг сўзларини Madrid Universal келтирди.

Лука Модрич 2012 йилдан 2025 йилгача «Реал» шарафини ҳимоя қилган.

Футболчининг «Милан» билан амалдаги шартномаси келаси ёзга қадар мўлжалланган. Модрич ҳозирча 2027 йилда футболчилик фаолиятини якунлаш-якунламаслиги борасида қарор қабул қилмаган.