Аргентина терма жамоаси ярим ҳимоячиси Энцо Фернандес 39 ёшли Лионель Мессининг миллий жамоадаги фаолиятини якунлаши ҳақида фикр билдирди.
"Лео бизга жуда етишмайди. Бугун қанчалик кўп йиғлаганимни тасаввур ҳам қила олмайсиз. Бу ақл бовар қилмас ҳолат", — дея футболчининг сўзларини инсайдер Фабрицио Романо ижтимоий тармоқларда келтирди.
6 октябрдан 7 октябрга ўтар кечаси Месси Аргентина терма жамоаси сафидаги хайрлашув учрашувини Бенинга қарши ўтказди. "Альбиселесте" 3:0 ҳисобида ғалаба қозонди. Лионель мазкур баҳсда битта гол урди ва иккита голли узатмани амалга оширди.
Умуман олганда, Месси Аргентина миллий жамоаси сафида 208 та учрашув ўтказиб, 126 та гол урди ва 69 та голли узатмани амалга оширди.
