Аргентина терма жамоаси ҳимоячиси Николас Отаменди ҳамюрти ва жамоадоши Лионель Месси ҳақида фикр билдирди. Аввалроқ ҳар икки футболчи миллий жамоа сафидаги сўнгги учрашувини ўтказган, мазкур баҳсда Лионель Скалони шогирдлари Бенинни 3:0 ҳисобида мағлуб этган эди.
"У жуда оддий ва камтар инсон. Бу унинг сўнгги ўйини бўлганини ўйлашнинг ўзи менда алоҳида ҳис-туйғулар уйғотади. Биз бу кун қачондир келишини билардик, аммо барибир катта ҳаяжон билан ўйнадик.
Бу бир вақтнинг ўзида ҳам қайғули, ҳам қувончли. Чунки хайрлашув айнан Лео муносиб бўлган тарзда ўтди", — дея Отамендининг сўзларини TyC Sports келтирди.
Месси 2005 йилдан буён Аргентина терма жамоаси сафида тўп суриб келган. Шу вақт мобайнида у 208 та учрашув ўтказиб, 126 та гол урди ва 69 та голли узатмани амалга оширди.
Лионель Месси Аргентина терма жамоаси билан жаҳон чемпиони бўлди, икки марта Америка кубогини қўлга киритди ва Финалиссима соврини соҳибига айланди.
