Мадриднинг «Реал» клубини тарк этган Дани Карвахаль ҳозирча янги жамоа топгани йўқ. Тажрибали ҳимоячи фаолиятини «Хетафе»да давом эттириши мумкин, бироқ томонлар ўртасидаги музокаралар осон кечмаяпти.

Сўнгги кунларда Испания матбуотида 34 ёшли футболчининг «Хетафе»га ўтиши мумкинлиги ҳақида хабарлар тарқалмоқда.

Mundo Deportivo нашрининг Radio Marca радиостанциясига таяниб хабар беришича, Карвахаль «Хетафе» билан шартнома имзолаш учун маошини сезиларли даражада камайтиришга тайёр.

Бироқ испаниялик ҳимоячи янги келишувга битта муҳим шарт киритилишини талаб қилмоқда.

Унга кўра, агар қишки трансферлар даврида бошқа клубдан таклиф келиб тушса, Карвахаль «Хетафе»ни тарк этиш ҳуқуқига эга бўлиши керак.

Футболчи айнан шу банднинг шартномада акс эттирилишини истамоқда. Бу эса томонлар ўртасидаги музокараларни мураккаблаштираётган омиллардан бири ҳисобланади.

Маълумот учун, Дани Карвахаль 2012/13 йилги мавсумда Германиянинг «Байер» клубида ижара асосида тўп тепган.

Фаолиятининг қолган асосий қисмини эса Мадриднинг «Реал» клубида ўтказган. Тажрибали ҳимоячи айни пайтда эркин агент мақомига эга.