«Ливерпуль» ва «Милан»нинг собиқ қанот ҳужумчиси Фабио Борини футболчилик фаолиятини якунлаганини маълум қилди.

«Мен ҳеч қачон ишонишдан тўхтамаган ўша йигитга миннатдорлик билдирмоқчиман. Бугунги кунга келиб шаклланган инсон эса кейинги имкониятга ишонишда давом этади. Бу сафар оёқларида тўпсиз, аммо худди аввалгидек ишонч билан. Ҳар доим. Раҳмат, футбол», — деб ёзди Борини Instagram саҳифасида.

35 ёшли Борини фаолиятини «Челси»да бошлаган ва клубнинг асосий жамоаси сафида атиги 8 та учрашув ўтказган.

Кейинчалик у «Суонси», «Парма», «Рома», «Ливерпуль», «Сандерленд», «Милан», «Верона», «Фатих Карагюмрюк» ва «Сампдория» клубларида тўп сурди.

Борини «Ливерпуль» сафида 38 та ўйинда майдонга тушиб, 3 та гол урган ва 3 та голли узатмани амалга оширган. «Милан»да эса 75 та учрашувда 8 та гол ва 6 та голли узатма қайд этган.

2025 йил октябрь ойида Борини Англиянинг куч жиҳатидан тўртинчи дивизионида иштирок этувчи «Солфорд» клубига ўтди. Ушбу жамоа футболчининг профессионал фаолиятидаги сўнгги клуби бўлди.

Фабио Борини 2012 йил Украина ва Польшада бўлиб ўтган Евро-2012 турнири финалига қадар етиб борган Италия терма жамоаси таркибига киритилган. «Скуадра Адзурра» сафида футболчи 1 та учрашув ўтказган.