«Монако» ярим ҳимоячиси Ламин Камара қишки трансферлар даврида Англия чемпионатига кўчиб ўтиши мумкин.
Журналист Бен Жейкобснинг хабар беришича, ёзда Камаранинг «Челси»га 55 миллион евро эвазига ўтиши амалга ошмаганидан сўнг, «Монако» футболчининг нархини 70 миллион еврога оширган.
Таъкидланишича, лондонликлар янги нархда сенегаллик футболчини сотиб олишга яна уриниб кўриши эҳтимоли паст. Бироқ «Челси»ни даъвогарлар сафидан бутунлай чиқариб ташлаб бўлмайди. Чунки Камара жамоа бош мураббийи Хаби Алонсога шахсан ёқади.
Манба маълумотларига кўра, айни пайтда 22 ёшли ярим ҳимоячини қўлга киритиш учун асосий даъвогар «Ливерпуль» ҳисобланмоқда.
Мерсисайдликлар майдон марказини кучайтиришни истамоқда. Шу билан бирга, клуб «Борнмут» футболчиси Алекс Скотт ва «Рома» ярим ҳимоячиси Ману Коне номзодларини ҳам кўриб чиқмоқда.
Ламин Камара жорий мавсумда барча мусобақалар доирасида еттита учрашувда майдонга тушиб, битта гол урган ва битта голли узатмани амалга оширган.
