Мадриднинг "Атлетико" клуби бош мураббийи Диего Симеоне жамоа ҳужумчиси Хулиан Альвареснинг айни пайтдаги ҳолатига баҳо берди.
"Мен унинг яхши ҳолатда эканини кўряпман. У иштиёққа тўла ва ҳар доимгидек бор кучини беришга тайёр.
Умид қиламанки, Хулиан буни майдонда ҳам намойиш этади ва аввалги юқори даражасига қайта олади.
Альварес яхши спорт формасида бўлганида, жамоамиз ҳужумда бутунлай бошқача ҳаракат қилади", — дея Симеоненинг сўзларини келтиради AS нашри.
Жорий мавсумда Хулиан Альварес Испания Ла Лигаси доирасида учта учрашувда майдонга тушган, аммо ҳозирча гол ёки голли узатма муаллифи бўлмаган.
Эслатиб ўтамиз, ёзда аргентиналик ҳужумчи "Барселона"га ўтишни истаган, бироқ "Атлетико" уни қўйиб юбормаган эди.
