"Бунёдкор" стадиони майдони чими билан боғлиқ муаммо ҳозирга қадар тўлиқ бартараф этилмаган. Айни вақтда клуб томонидан майдонни парваришлаш ишлари давом эттирилмоқда.
Суперлиганинг 24-тури доирасида "Бунёдкор" 16 октябрь куни "Сўғдиёна"ни қабул қилиши лозим эди. Бироқ учрашувни ўтказиш учун муносиб стадион топишда муаммо юзага келди.
"Локомотив" стадиони ҳам вариант сифатида кўриб чиқилган, аммо бир кундан сўнг ушбу аренанинг ўзида расмий учрашув ўтказилиши сабабли бу режа амалга ошмади.
"Жар" ва "Олимпия" стадионларида эса айни пайтда таъмирлаш ишлари давом этмоқда. "Пахтакор" Осиё Чемпионлар лигасидаги иштироки сабаб стадион масаласида "Бунёдкор" билан келиша олмаган. Олмалиқда эса "Сурхон" ўз уй учрашувларини ўтказмоқда.
Шу вазиятдан келиб чиқиб, "Бунёдкор" учрашувни рақиб майдонида ўтказишга қарор қилди.
"Сўғдиёна" — "Бунёдкор" баҳси 16 октябрь, жума куни соат 19:00 да бошланади.
