«Тоттенхэм» бош мураббийи Роберто Де Дзерби жамоасини Испаниянинг Марбелья шаҳрида ўтказиладиган тўққиз кунлик ўқув-машғулот йиғинига олиб боради.
Италиялик мутахассис футболчиларни тайёрлашда ноодатий усуллардан фойдаланиши билан танилган ва бу сафар ҳам ўз ёндашувига содиқ қолмоқда.
«Манчестер Юнайтед»га қарши учрашувдан сўнг Де Дзерби жамоани Испанияга олиб боришга қарор қилди. Марбельяда ташкил этиладиган йиғин давомида асосий эътибор майдондаги машғулотлар билан бир қаторда футболчилар ўртасидаги ҳамжиҳатликни кучайтириш ва жамоавий руҳни мустаҳкамлашга қаратилади.
«Тоттенхэм» футболчилари 19 октябрь, душанба куни бўлиб ўтадиган навбатдаги учрашувга қадар Марбельяда тайёргарлик олиб боради.
Қайд этиш жоиз, Де Дзерби бундай усулдан аввал ҳам фойдаланган. Хусусан, 2025 йил апрель ойида «Марсель»ни бошқарган даврида жамоа қийин вазиятни бошдан кечираётган бир пайтда футболчилар ўртасидаги бирдамликни кучайтириш мақсадида Рим шаҳрида махсус ўқув-машғулот йиғини ташкил этган эди.
