«Барселона» ҳимоячиси Пау Кубарси УЕФА Чемпионлар лигаси доирасида «Галатасарой»га қарши ўтказиладиган учрашув олдидан жамоадоши Френки де Йонгнинг ўйин сифатларини юқори баҳолади.

Сўнгги вақтларда нидерландиялик ярим ҳимоячидан марказий ҳимоя позициясида ҳам фойдаланиш имконияти муҳокама қилинмоқда.

Кубарсининг фикрича, Де Йонг ўзининг универсаллиги ва техник имкониятлари туфайли ҳимояда ҳам юқори савияда ҳаракат қила олади. Бироқ у футболчининг асосий позицияси айнан ярим ҳимоя эканини алоҳида таъкидлади.

«У ажойиб футболчи. Аммо ўзининг асосий позициясида дунёнинг энг яхши ўйинчиларидан бири ҳисобланади.

Ишончим комилки, у марказий ҳимояда ҳам жуда юқори савияда ўйнай олади ва жамоамиз учун муҳим футболчи бўлиб қолади», — деди Кубарси.

Шунингдек, испаниялик ҳимоячи ёш бўлишига қарамай, «Барселона» сафида майдонга тушиш катта масъулият талаб қилишини таъкидлади.

Унинг фикрича, асосий таркибда ўйнаётган футболчига ёши сабабли енгиллик берилмаслиги керак.

«Агар майдонга тушсам, бошқа барча футболчилар билан бир хил вазифаларни бажаришим шарт. Мен айнан шунга тайёрман», — деди Кубарси.

Шу тариқа, ёш ҳимоячи Де Йонгнинг турли позицияларда жамоага фойда келтира олишига ишонч билдириш билан бирга, «Барселона»да ҳар бир футболчидан бир хил даражада масъулият ва юқори савиядаги ўйин талаб этилишини қайд этди.