Англиялик мураббий Гарет Саутгейт Премьер-лига клубларидан бирида ишлаши мумкинлиги ҳақидаги саволга жавоб берди.
«Қандай шароитда яна бу ишга қайтишим мумкинлигини тасаввур ҳам қила олмайман. Англия терма жамоасидаги фаолиятимнинг охирларига келиб, бу ишдан завқ олмай қўйгандим. Дастлаб ғалабалар қизиқишимни маълум даражада сақлаб турарди, кейин эса... Ўша пайтга келиб, ҳатто ғалабалардан ҳам атиги бир-икки дақиқа хурсанд бўлардим. Ўшандан бери футболни деярли томоша қилмайман.
Англия кубоги финалига ўз жамоам — “Кристал Пэлас”нинг илк совринини қўлга киритишини кўриш учун боргандим. Ўшандан бери футбол стадионларига бошқа бормаганман. Шунинг учун футболга алоқадор бўлиш истагим анча ўзгарди», — дея Саутгейтнинг сўзларини келтиради Sky Sports.
Эслатиб ўтамиз, 56 ёшли Гарет Саутгейтнинг сўнгги иш жойи Англия терма жамоаси бўлган. У 2024 йилда терма жамоани тарк этган.
