«Манчестер Юнайтед» ва Аргентина терма жамоаси ҳимоячиси Лисандро Мартинес Мадриднинг «Атлетико» клубидан Чемпионлар лигасида қабул қилинган мағлубиятдан (0:2) кейин жамоа ва мураббийлар штабига нисбатан билдирган ҳиссий фикрлари учун расман узр сўради.

Футболчи ижтимоий тармоқларда расмий баёнот эълон қилди.

«Бугун клуб раҳбарияти ва бош мураббий билан учрашдим. Суҳбат жуда ижобий ўтди: биз фикрларимизни ўзаро алмашиб, сешанба кунги ўйиндан кейин содир бўлган воқеаларни очиқ муҳокама қилишга муваффақ бўлдик.

Ҳамма менинг ҳиссиётларга берилувчан инсон эканимни ва футболга улкан иштиёқ билан ёндашишимни билади. Мағлубиятдан кейинги тушкунлик мени ҳиссиётларга берилиб гапиришга ундади. Бунинг учун энг муносиб вақт ва жойни танламаганимни тан оламан. Бу ҳолат учун чин дилдан узр сўрамоқчиман.

Клубимиз энг яхши натижаларга фақат барчамиз бирдам бўлганимиздагина эриша олади. Ўша пайтда айтган гапларим жамоавий бирдамликка хизмат қилмаганини тушунаман.

«Манчестер Юнайтед»даги ҳар бир инсон клуб ва мухлисларимиз муносиб бўлган муваффақиятга эришиш учун бор кучини сарфлаётганини биламан. Энди бу вазият ортда қолганидан сўнг, биз биргаликда ғалаба қозонишга тўлиқ эътибор қаратмоқдамиз», — деб ёзди Мартинес ижтимоий тармоқларда.