Испаниялик машҳур собиқ ҳужумчи Фернандо Морьентес Мадриднинг "Реал" клуби футболчиси Винисиус Жуниорнинг Ла Лига доирасида тўртта учрашувга дисквалификация қилинишига муносабат билдирди.
Эслатиб ўтамиз, бразилиялик вингер "Вильярреал"га қарши ўйинда рақиб футболчиларидан бирининг сочидан тортгани учун қизил карточка олиб, майдондан четлатилган эди. Ушбу ҳаракати сабаб Винисиус Испания чемпионатининг тўртта учрашувидан четлатилди.
"Бу ақлбовар қилмайдиган ҳолат. Мен бундан жуда хафаман. Иккита ўйинлик дисквалификация ҳам етарлидан ортиқ бўларди, аммо тўртта учрашувга четлатиш — бу мутлақо адолатсиз қарор.
Уни гўё рақибига ҳужум қилгандек жазолашди. Лекин бу ерда қандай ҳужум ҳақида гап кетиши мумкин?
Бу вазиятда тўғридан-тўғри қизил карточка кўрсатилиши тўғри бўлганига қўшиламан. Аммо бундай ҳаракат учун тўртта ўйинга дисквалификация қилиш — ҳаддан ташқари оғир жазо", — дея Морьентеснинг сўзларини келтиради Madrid Zone.
Қайд этилишича, Винисиус Жуниор дисквалификация туфайли "Севилья", "Барселона", "Расинг" ва "Валенсия"га қарши учрашувларни ўтказиб юборади.
