"Ливерпуль" қишки трансферлар ойнасида ҳужум чизиғидаги футболчиларидан бири билан хайрлашиши мумкин. Бу ҳақда журналист Экрем Конур ижтимоий тармоқларда хабар берди.
Манбанинг маълум қилишича, италиялик қанот ҳужумчиси Федерико Кьезанинг мерсисайдликлар сафини тарк этиш эҳтимоли тобора ортиб бормоқда.
28 ёшли футболчи жорий мавсумда "Ливерпуль" таркибида бор-йўғи икки дақиқа майдонда ҳаракат қилган. Бундан ташқари, у жамоанинг УЕФА Чемпионлар лигаси учун тақдим этилган қайдномасига ҳам киритилмаган.
Айни пайтда Кьезанинг вазиятини Италия А Сериясининг бир қатор клублари диққат билан кузатиб бормоқда. Хусусан, "Ювентус", "Лацио" ва "Аталанта" футболчини ўз сафига қўшиб олиш имкониятига қизиқиш билдирмоқда.
Қайд этилишича, Федерико Кьезанинг "Ливерпуль" билан амалдаги шартномаси 2028 йил июнь ойи охирига қадар мўлжалланган.
Италиялик футболчининг ҳозирги трансфер қиймати 10 миллион еврога баҳоланмоқда.
