«Тоттенхэм» бош мураббийи Роберто Де Дзерби жамоа қанот ҳужумчиси Деян Кулушевски Англия Премьер-лигасининг 7-тури доирасида «Ковентри»га қарши ўтказиладиган учрашув қайдномасидан жой олишини тасдиқлади.

«Ҳа, Кулушевски захира ўриндиғида бўлади. Биз тиббий штаб билан учрашув ўтказдик ва шифокорлар унинг қайтишига рухсат беришди. Бу ажойиб янгилик.

Менимча, бу биз учун энг яхши хабарлардан бири. Чунки Деки жуда кўп қийинчиликларни бошдан кечирди. У яна майдонга тушиб, футбол билан боғлиқ ҳиссиётларни туйишга муносиб.

Кеча машғулотдан кейин у билан суҳбатлашдим ва шундай дедим: «Деки, қара, мен тиббий штаб билан гаплашдим, улар сенинг ўйнашингга рухсат беришди».

Бу гапларни эшитиши билан унинг юзида табассум пайдо бўлди. Биз жуда бахтиёрмиз. Ҳақиқатан ҳам, ниҳоятда хурсандмиз.

Бу ерда гап ҳатто футбол ҳақида ҳам кетаётгани йўқ. Мен ҳозир футболни назарда тутмаяпман. Ҳа, у ўзига хос футболчи, аммо масала бундан ҳам муҳимроқ.

У жуда кўп азоб чекди. Унинг бу хабарга билдирган муносабати эса ажойиб бўлди», — деди Де Дзерби.

Эслатиб ўтамиз, Деян Кулушевски сўнгги марта 2025 йилнинг 11 май куни Англия Премьер-лигаси доирасида «Кристал Пэлас»га қарши ўтказилган учрашувда майдонга тушган эди. Ўша баҳс «Тоттенхэм»нинг 0:2 ҳисобидаги мағлубияти билан якунланган.

Шу тариқа, швециялик футболчи қарийб 17 ойлик танаффусдан сўнг яна жамоасининг ўйин қайдномасига қайтмоқда.