Германия Бундеслигасининг 6-тури доирасида «Байер» ўз майдонида «Фрайбург»ни қабул қилди. Учрашув леверкузенликларнинг 2:1 ҳисобидаги иродали ғалабаси билан якунланди.

Баҳснинг 14-дақиқасида меҳмонлар ҳисобни очишди. Дерри Шерхант рақиб дарвозасини ишғол этиб, «Фрайбург»ни олдинга олиб чиқди.

Бироқ «Байер» футболчилари учрашув давомида вазиятни ўз фойдаларига ўзгартиришга муваффақ бўлишди.

Мезбонлар сафида Иброҳим Маза ва Патрик Шик биттадан гол уришди. Эътиборлиси, ҳар икки футболчи бир-бирининг голига ассистентлик ҳам қилди.

Шу тариқа, «Байер» ҳисобда ортда бораётганига қарамай, муҳим уч очкони қўлга киритди.

«Фрайбург» эса жорий мавсумда барча мусобақалар доирасидаги илк мағлубиятини қабул қилиб олди.

Шунга қарамай, жамоа 13 очко билан Бундеслига турнир жадвалида учинчи ўринни сақлаб қолди.

«Байер» ҳам 13 очко жамғарган бўлиб, қўшимча кўрсаткичлар бўйича «Фрайбург»дан ортда қолган ҳолда тўртинчи поғонада жойлашган.

Германия чемпионати. Бундеслига. 6-тур.

18 октябрь, 18:30. «БайАрена» (Леверкузен)

«Байер» — «Фрайбург» — 2:1

Голлар: Шерхант, 14 (0:1), Маза, 19 (1:1), Шик, 76 (2:1).

«Байер» таркиби: Флеккен, Медина, Тапсоба, Гутьеррес, Куанса, Фернандес, Гарсия, Маза (Хофманн, 84), Морейра (Телла, 59), Диаби (Тилльман, 73), Шик.

«Фрайбург» таркиби: Бакхаус, Линхарт, Гинтер, Макенго, Трой (Кюблер, 64), Эггештайн, Энгельхардт (Остераге, 77), Гото (Хелер, 65), Шерхант (Грифо, 89), Бесте (Ирье, 77), Матанович.

Сариқ карточка: Трой (39, «Фрайбург»).