«Пари Сен-Жермен» Чемпионлар лигасининг 3-турида «Барселона»га қарши ўйин олдидан икки футболчисининг сафга қайтиши билан боғлиқ хушхабар олди.
Магнес Аклиуш ва Сенни Маюлу жисмоний ҳолати билан боғлиқ муаммолардан тўлиқ тикланди. Ҳар икки футболчи ҳам Луис Энрикенинг учрашув қайдномасидан жой олишга тайёр.
Diario AS нашри маълумотига кўра, улар душанба куни жамоанинг одатдаги машғулотида ҳеч қандай чекловларсиз иштирок этган. Бу машғулот парижликларнинг Чемпионлар лигаси 3-тури олдидан сўнгги тайёргарлиги бўлди.
24 ёшли Аклиуш ўтган ёзда «ПСЖ»га келиб қўшилганидан буён жамоанинг қанотдаги муҳим футболчиларидан бирига айланди.
20 ёшли Маюлу эса Витинья, Фабиан Руис ва Жоау Невеш билан бир қаторда майдон марказида Луис Энрикега қўшимча имкониятлар тақдим этмоқда.
Қизиғи, ҳар икки футболчи ҳам аввал «Барселона» дарвозасига гол урган.
Аклиуш 2024 йилнинг сентябрь ойида «Монако»нинг каталонияликлар устидан 2:1 ҳисобидаги ғалабасида гол муаллифи бўлган. Маюлу эса 2025 йилнинг октябрида «ПСЖ»нинг «Барселона»га қарши 2:1 ҳисобида якунланган баҳсида тўп киритган.
Ҳар икки футболчининг асосий таркибда майдонга тушиши кутилмаётган бўлса-да, уларнинг сафга қайтиши Луис Энрикенинг захира ўриндиғидаги имкониятларини кенгайтиради.
Бироқ парижликлар бош мураббийи ҳимоя чизиғидаги муҳим муаммони ҳал қилишига тўғри келади. Нуну Мендеш учрашувда иштирок эта олмайди.
Шу сабабли «Барселона» вингери Ламин Ямалга қарши чап қанот ҳимоясида Люка Динь, Люка Эрнандес ёки Уоррен Заир-Эмеридан бири ҳаракат қилиши мумкин.
«ПСЖ» ва «Барселона» ўртасидаги учрашув сешанба куни Париждаги «Парк де Пренс» стадионида бўлиб ўтади.
