«Бетис» ҳимоячиси Эктор Бельерин испаниялик стример ва YouTube блогери Микель Ангулога қарши судга мурожаат қилди. Бунга блогернинг футболчи ҳақидаги ҳақоратли ва гомофобия аломатларига эга деб баҳоланган фикрлари сабаб бўлган.
Воқеа сентябрь ойи бошида «Бетис» ва Мадриднинг «Реал» клублари ўртасидаги учрашув вақтида юз берган. Ангуло YouTube платформасидаги жонли эфир давомида ўйинни шарҳлар экан, Бельериннинг ташқи кўриниши билан боғлиқ айрим жиҳатларни масхара қилган.
Derbyderbyderby.it нашри Europa Press агентлигига таяниб хабар беришича, футболчининг шикоятида блогер нафрат замиридаги жиноятни содир этиш ҳамда омма олдида оғир ҳақоратлар қилишда айбланмоқда.
Мазкур шикоят Севилья шаҳридаги суднинг тергов бўлимига тақдим этилган. Энди Ангулонинг хатти-ҳаракатларига ҳуқуқий баҳо берилиши кутилмоқда.
