ФИФА Қитъалараро кубогининг 2026 йилги финали 16 декабрь куни Қатарнинг Эр-Райян шаҳридаги "Аҳмад бин Али" стадионида бўлиб ўтади. Бу ҳақда Франциянинг "Пари Сен-Жермен" клуби расмий сайти хабар берди.
Финалда Чемпионлар лигаси ғолиби ва амалдаги Қитъалараро кубок соҳиби "Пари Сен-Жермен" Challenger Cup мусобақасида ғолиб чиққан жамоага қарши майдонга тушади.
Ушбу мусобақада Мексиканинг "Депортиво Толука" клуби (КОНКАКАФ Чемпионлар кубоги ғолиби) ва Жанубий Африканинг "Мамелоди Сандаунз" жамоаси (Африка чемпиони) иштирок этади. Мусобақанинг сўнгги иштирокчиси 2026 йилги Либертадорес кубоги ғолиби бўлади.
2025 йилда "ПСЖ" Қитъалараро кубокни қўлга киритган эди. Парижликлар финалда Бразилиянинг "Фламенго" клубини асосий вақтда 1:1 ҳисобида дуранг ўйнаб, пенальтилар сериясида 2:1 ҳисобида мағлуб этишган.
