"Барселона" ярим ҳимоячиси Френки де Йонг жароҳати сабаб узоқ вақт майдонга тушмагани учун ўзига қаратилган танқидларга муносабат билдирди.
"Доим шундай бўлган. Мени асосан майдонда бўлмаган, ўйнай олмаган пайтларимда танқид қилишади. Бу сафар ҳам вазият такрорланди. Бунинг сабабларини яхши тушунаман.
Мухлисларни ҳам тушунаман. Улар менинг терма жамоада ўйнаганимни кўришди, аммо ўзлари мухлислик қиладиган клубда майдонга тушмаганимдан норози. Жаҳон чемпионати охиригача ўйнаб, кейин уч ой майдонга чиқмаганим уларга ғалати туюлиши табиий", — деди нидерландиялик футболчи.
Де Йонг жароҳати дастлаб тахмин қилинганидан жиддийроқ бўлиб чиққанини ва унинг даволаниши ҳақида тарқалган турли миш-мишлар ўзини ҳам хафа қилганини таъкидлади.
Айни пайтда футболчи машғулотларга қайтган ва "Реал"га қарши "эл-класико"да майдонга тушишга тайёрлигини билдирган.
