«Наполи» президенти Аурелио Де Лаурентис жамоасининг «Лацио»га қарши учрашуви учун белгиланган вақтдан норози.
У Италия чемпионатининг 11-туридан ўрин олган баҳсни кечки вақтга кўчириш учун ҳаракат қилмоқда.
Учрашув 8 ноябрь куни Неаполдаги «Диего Армандо Марадона» стадионида соат 12:30 га белгиланган. Де Лаурентис бундай муҳим ўйиннинг тушлик пайтида ўтказилишини клуб ва мухлисларга нисбатан «ҳурматсизлик» деб ҳисобламоқда.
Бундан ташқари, эрта бошланадиган учрашув жамоанинг одатий тайёргарлик тартибини ўзгартиришга мажбур қилади. «Наполи» футболчилари ўйиндан бир кун олдин кечқурун меҳмонхонада йиғин ўтказиши керак бўлади.
Шу сабабли клуб президенти баҳсни кечки вақтга кўчиришни истамоқда. Бироқ учрашув жадвали аввалдан тасдиқлангани ва ўша куни бошқа ўйинлар ҳам белгилангани бу масалани ҳал қилишни қийинлаштирмоқда.
Ҳозирча «Наполи» – «Лацио» учрашуви 8 ноябрь куни соат 12:30 да бошланиши режалаштирилган.
