Мадриднинг «Атлетико» клуби бош мураббийи Диего Симеоне Ла Лигада мураббий сифатида қайд этилган ғалабалар сони бўйича рекордни такрорлади. Бу ҳақда Opta хабар бермоқда.

Ушбу натижа Испания чемпионатининг 11-туридан ўрин олган «Леванте»га қарши учрашувда қайд этилди. Мадридликлар сафарда 2:0 ҳисобида ғалаба қозонди. Баҳс Валенсиядаги «Сьюдад де Валенсия» стадионида бўлиб ўтди.

Бу ғалаба Симеоне учун Ла Лигадаги 565-учрашувидаги 344-ғалаба бўлди. Шунингдек, унинг ҳисобида 123 та дуранг ва 98 та мағлубият бор.

Шу тариқа, аргентиналик мутахассис Луис Арагонеснинг рекордини такрорлади. Арагонес ҳам Испания чемпионатида мураббий сифатида 344 марта ғалаба қозонган, бироқ бу натижага 756 та учрашувда эришган.

Испания чемпионатидаги 11 та ўйиндан сўнг «Атлетико» 28 очко билан турнир жадвалида пешқадамлик қилмоқда. «Леванте» эса 10 очко билан 16-ўринда бормоқда.