Ўзбекистон ёшлар (U19) терма жамоаси Доҳада бўлиб ўтаётган "А" гуруҳидаги ўзининг иккинчи баҳсида йирик ҳисобда ғалаба қозонди ва очколари сонини 6тага етказиб олди. Евстафеев шогирдлари Непал даврозасига жавобсиз 5та тўп йўллашди.

Учрашувда "Машъал" ҳужумчиси Элдор Шомуродов "хет-трик"ка эришган бўлса, Нормуродов ва Давлатов биттадан голга муаллифлик қилишди. Айниқса, жамоамизнинг биринчи голини киритган Нажмиддин Нормуродовнинг жарима зарбасидан йўллаган зарбаси чиройли чиқди.

Ўйин давомида вакилларимиз тўла устунликка эга бўлишди. Непал эса деряли қаршилик кўрсата олмади. Боз устига, иккинчи бўлим бошида непаллик ҳимоячи дарвозабон билан бирга-бир вазиятга чиқиб бораётган Забиҳилло Ўринбоевни ортидан тепиб йиқитгани учун майдондан четлатилди.

Биринчи ўйинда қатор вазиятлардан фойдалана олмаган Шомуродов бу сафар ўз камчиликларини тўғрилади ва 3та голга муаллифлик қилди.

Ушбу ғалабадан кейин терма жамоамиз ҳисобидаги очколар сони 6тага етди. Бугун Қатар Туркманистон билан баҳс олиб боради.

Ушбу ўйиндан матнли трансляция сайтимиз орқали амалга оширилди.

Ёшлар ўртасидаги Осиё чемпионатига саралаш
"А" гуруҳи. 3-тур. Доҳа.
ЎЗБЕКИСТОН U-19 - НЕПАЛ U-19 - 5:0 (2:0)
Голлар: Нажминддин Нормуродов (14), Элдор Шомуродов (35, 60, 71), Бобур Давлатов (49-пен.)
ЎЗБЕКИСТОН U-19: 12. Шерзодбек Абдураимов, 2. Азизбек Мамазоитов, 3. Аббосжон Отахонов, 7. Сардорбек Азимов, 10. Элдор Шомуродов (Андрей Сидоров 71), 13. Бобур Давлатов (Жавоҳир Соҳибов 63), 14. Меҳрож Ғуломов, 16. Нажмиддин Нормуродов, 17. Дурбек Камолов (Мақсуджон Маҳмудов 46), 19. Забиҳилло Ўринбоев, 33. Достонбек Турсунов.

1. Ўзбекистон — 6 (2та ўйин)
2. Қатар — 3 (1)
3. Ҳиндистон — 3 (2)
4. Туркманистон — 3 (2)
5. Непал — 0 (3)