«Навбаҳор» аъзолари бугундан навбатдаги турга тайёргарликни бошлашди. Миллий терма жамоамизнинг Осиё кубоги саралаш турниридаги иштирок туфайли Гулистондаги учрашувдан сўнг жамоа аъзоларига қиcқа муддатлик таътил эълон қилинганди.

Сўнгги пайтларда иккинчи давра арафасида “Навбаҳор”да иш бошлаган Роберт Гай билан боғлиқ кўплаб гап-сўзлар кўпайиб кетганди. Лекин, Гай чинданам бетоб бўлганлиги боис маълум вақт давомида уйида даволанди. Шу сабабдан Гайни “Навбаҳор”дан кетди деган миш-мишлар ҳеч қандай асосга эга эмас. Барчага маълумки, айни пайтда жамоамиз мусобақа жадвалида 11-ўринни банд этиб турибди. Сўнгги турларда эса очколар сонини ошириш муҳим ҳисобланади. Айнан шуларни инобатга олган ҳолда клуб раҳбарияти мураббийлар штабига мухлисларимизга яхши таниш бўлган Нўъмон Ҳасановни таклиф этишди. Бир неча кун давом этган музокаралар якунига кўра бундан бир неча соат олдин Ҳасанов “Навбаҳор”да ишлашга розилик билдирди ва дастлабки машғулотда қатнашишга ҳам улгурди. Ҳасанов жамоамизда маслаҳатчи мураббий сифатида иш юритади. Роберт Гай эса жамоада селекционер мураббий сифатида иш юритишига ҳам келишиб олинди. Гай жамоамизга ёш ва иқтидорли футболчиларни жалб этиш билан шуғулланадиган бўлди.