Қозоғистон чемпионати якунланишига 1та тур қолди. "Актобе" 31-турда "Астана"га ютқазиб қўйган бўлса-да, ушбу рақибидан 3 очко олдинда бормоқда. Эътиборлиси, ушбу баҳсда узоқ танаффусдан кейин Марат Бикмаев захирадан майдонга тушди. Ўзбекистонлик футболчи Sports.kz сайтига интервью бериб, мазкур ўйин ва якунланаётган мавсум ҳақида ўз фикрларини билдириб ўтди.

— Бугун ёмон ўйнамадик, аммо омад рақиб томонида бўлди. Тезкор гол ўтказиб юбордик ва шундан кейин ҳисобни тенглаштириш қийин кечди. Ўйиндан олдин режалаштирган ишларимизни майдонда амалга ошира олмадик. Умуман олганда, ўйин мухлисларга ёққан бўлиши керак, аммо биз учун омадсиз якунланди.

— Ҳисобда ортда бораётган "Актобе" нима учун сўнгги дақиқаларда катта куч билан олдинга интилмади?
— Бирор нарса дейиш қийин. "Астана" бўш зоналарда қолдирмаган ҳолда, ҳисобни сақлаб қолиш учун ўйнади. Шунинг учун сўнгги дақиқаларда рақиб дарвозаси олдида хавфли вазиятларни ярата олмадик.

— Астанадаги баҳс сиз учун узоқ давом этган танаффусдан кейин илк ўйин бўлди. Оптимал формага кириб олишингиз учун қанча вақт керак бўлади?
— Анчадан бери ўйнамаётганим учун футболни соғингандим. Албатта, ҳозирча ўйинларга 100 фоиз тайёр эмасман. Эски жароҳатим ҳамон безовта қилмоқда. Ўз устимда ишлаб, формамни тиклашга ҳаракат қиламан.

— Якунланаётган мавсум сиз учун омадсиз бўлди, деб айта оласизми?
— Албатта. Биринчидан, жароҳат олдим, иккинчидан, мавсумда бирорта ҳам гол ура олмадим. Ушбу мавсум мен учун муваффақиятсиз бўлди.

— "Актобе" эса мавсумни бир текис ва барқарор ўтказди. Бунинг сири нимада?
— Менимча, бу мураббийнинг хизматлари эвазига.

— Мухлисларнинг қўллаб-қувватлаши ҳақида нима дея оласиз?
— Бутун мавсум давомида бизни қўллаб-қувватлаб тургани учун мухлисларга катта раҳмат айтмоқчиман. Улар Қозоғистондаги энг яхши мухлислар! Жамоа қандай бўлса, мухлислар ҳам шундай бўлади.

— Юртимизда футбол мавсуми якунланмоқда. Фикрингизча, сўнгги йилда Премьер-лига савияси ошдими?
— Қозоғистон чемпионати савияси юқори ва у йилдан-йилга ўсиб бормоқда. Барча жамоалар курашишмоқда. Масалан, ушбу мавсумда бирорта ҳам ўйинни осонлик билан ютдик, деб айта олмайман. Ғалаба қийинчилик эвазига қўлга киритилса, ширинроқ бўлади.