Франциянинг Сан-Дизьер шаҳрида сузиш бўйича ёшлар ўртасида ўтказилган анъанавий халқаро турнирда Ўзбекистон ёшлар терма жамоаси аъзолари 3 тадан олтин, кумуш ва бронза медалларига сазовор бўлдилар.    Терма жамоамиз ҳисобига олтин медалларни Андрей Тарасенко 50, 100 ва 200 метр масофага эркин усулда сузиш мусобақаларида келтирди. Андрей 50 метр масофани 25,41 сонияда сузиб ўтган бўлса, 100 метрга масофага ўтказилган мусобақаларда 54,36 сония натижани қайд этди. 200 м.масофага эркин усулда сузиш баҳсларида марра чизиғига биринчи бўлиб етиб келган Андрей, учинчи бор шохсупанинг энг юқори поғонасига кўтарилди.    50 ҳамда 100 метрга баттерфляй усулда сузиш бўйича ўтказилган баҳсларда Темур Латипов ҳар икки масофада ҳам кумуш медаллар билан тақдирланди. Яна бир кумуш медалга Абдуллахўжа Ахрорхўжаев 50 метр масофага брасс усулида сузиш мусобақаларида сазовор бўлди. Умидли спортчимиз ушбу масофани 31,89 сонияда сузиб ўтди.    Брасс усулида сузиш мусобақаларида, шунингдек, Арсен Алиев бир йўла учта бронза медали соҳиби бўлди.