Агар бугунги кунда футбол бўлмаганида нима бўларди? Мантиқсиз савол шундай эмасми? Умуман олганда, ҳаётини футболсиз тасаввур қила олмайдиган инсонлар етарлича топилади. Кўпчилик футболчиларга футболчи бўлмаганинггизда қайси касбни танлардингиз деган савол берилиши табиий. Ана шу саволларга берилган жавоблардан келиб чиққан ҳолда ушбу мақолани тайёрлашга қарор қилдим. Энди тасаввур қилинг айрим футболчиларимиз футболчи бўлмаганида, уларни қайси соҳада учратиб қолардингиз.
Ўзбекистоннинг ва Осиёнинг икки карра энг яхши футболчиси бўлган Сервер Жепаров эҳтимол гимнастикани танлаши ҳам мумкин эди. Агар футбол бўлмаганида у ҳозир гимнастика залларида болаларга дарс бериб юрган бўлармиди. У гимнастика билан яхши шуғулланганлигига шубҳа қилувчилар бўлса, Сервер голни қандай нишонлашини кўз олдиларига келтирсалар бас, шубҳалар дарров тарқайди.
Футболчилар мактабда яхши ўқимаганлар деган теоремага қарши чиқувчилар йўқ эмас. Масалан «Локомотив» ярим ҳимоячиси Шерзод Шарипов бугунги кунда фан соҳасини танлаган бўлиши ҳам мумкин эди. Яъни у мактабда яхши баҳоларга ўқиган ва шу сабабли ҳам обрўли институтда ўқиб, илм-фан соҳасини танлаб ушбу соҳада ҳам ўз ўрнига эга бўлган бўлармиди.
Шерзод Раимжонов ҳам аъло баҳоларга ўқиб, мактабни олтин медалга битирган. У 2 та дипломга эга. ФарДУнинг жисмоний тарбия ҳамда иқтисодиёт факультетларини тамомлаган. Эҳтимол уни бугун футбол майдонида эмас, қайсидир банкнинг ходими сифатида кўрармидик. Шунингдек, «Пахтакор» футболчиси Владимир Козак ҳам банк соҳасида фаолият юритаётган бўлиши мумкин эди.
«Металлург» клуби дарвозабони Маъмур Икромов футболни танламаганида, таржимон бўларди. Чунки у мактабда инглиз тилини аъло баҳоларга ўқиган. Эҳтимол у бугунги кунда хорижлик сайёҳларга таржимонлик қилиб юрган бўлармиди.
«Насаф» ярим ҳимоячиси Мирзакамол Камолов балки бугун ҳуқушунос бўлиши ҳам мумкин эди. Чунки у тарихга жудаям қизиққан. У футбол бўлмаганида адвокат ёки прокурор бўлиши аҳтимоли катта эди. «Машъал» жамоасининг узоқ йиллик сардори Габит Сапаргалиев ҳам Мирзакамол сингари ҳуқуқшунос бўлиши мумкин эди. Сабаби Габитнинг отаси ўғлини футболни эмас, айнан юқоридаги соҳани танлашини жуда хоҳлаган.
«Нефтчи» жамоаси ҳужумчиси Носир Отақўзиев ҳарбий соҳани танлаб, генерал ёки командир бўлиб ишлаётган бўларди. Агарки футболчи бўлмаганида. Ҳа, уни ҳарбий формада тасаввур қилиш кўпчилик учун қизиқ туюлса керак.
Агар йўлда такси тўхтатиб, унга ўтирсангиз ҳайдовчи сифатида Ҳикмат Ҳошимовни ҳам кўришингиз мумкин эди. Афсуски бундай бўлишига футбол тўсқинлик қилган. Ҳикматнинг отаси кўп йиллар мобайнида шу касбнинг орқасидан оила тебратган. Шу боис унинг болалигидан шу касбга қизиқиши баланд бўлган. Умуман олганда автомобил бошқаришни жону дили деб ҳисоблайди. Мабодо у йўлда қоидани бузса, ДАН ходимларининг қўлига тушиб қолса, ана шу яшил формада бугунги кунда Баҳром Ҳайдаров ёки «Бухоро» клуби форварди Баҳриддин Ваҳобовлар бўлишлари эҳтимоли ҳам катта эди. Зеро улар футболни танламаганларида айнан мана шу соҳани танлаган бўлишарди.
Ўзбекистон чемпионатида икки маротаба тўпурарликни қўлга киритган Умид Исоқов ва «Локомотив»да акаси билан ажойиб тандемни ҳосил қилган Фарход Тожиевларни тадбиркор сифатида кўришимиз ҳам мумкин эди. Улар олди-сотди ишларида анча фаол ишлашларини сўнгги пайтларда тез-тездан жамоаларини ўзгартирганликларидан ҳам билиб олиш мумкин. Бекзод Абдумўминов футболни танламаганида, мусаввир бўларди. Чунки болалигидан расм чизишга жуда қизиққан. Ҳалигача бўш вақти бўлиб қолса, табиат манзараларини чизади. Балки у бугун машғулотлар майдонида эмас, Парижда расмлари кўргазмасини ўтказишга тайёрланаётган бўлармиди. Яна ким билади дейсиз. Балки бироз ошириб юборгандирмиз. Бироқ Бекзод машҳур рассом бўлиши мумкин эди барибир.
Агар сиз тишингиз оғриб, стаматологга бориб қолсангиз у ерда Азиз Ҳайдаровга кўзингиз тушиб қолса, ажабланмаган бўлардингиз. Сабаби у тиш доктори бўлишни ҳам орзу қилган. Мобода Азиз фаолиятини якунлагач, ўзига клиника очиб олар. Исроил Эргашев ёшлигидан тракторга қизиққан. Шу боис футболни танламаганида эҳтимол ота касби тракторчиликни танлаши мумкин эди. «Навбаҳор» жамоаси ҳимоячиси Абдумажид Тоиров футболни танламаганида барибир спорт соҳасида қолган бўларди. У жисмоний тарбия фани ўқитувчиси ёки мураббий бўлиши аниқ эди. Шунинг учун ҳам фаоилятини якунлаганидан сўнг у мураббийлик соҳасини танлашига шубҳа қилмасак ҳам бўлаверади. «Насаф» форварди Кенжа Тўраев ҳам спортчи бўлиб қоларди. Уни кураш гиламида кўришиб қолсак ажабланмасдик. Ҳар ҳолда Кенжани кўрганлар уни курашчи эканлигига асло шубҳа қилмаган бўлишарди.
Хуллас мана азиз футболимиз ихлосмандлари айрим футболчиларимиз футболни танламаганларида қайси касб эгаси бўлишлари ҳақида сизга озгина бўлсада маълумот бера олган бўлсак, бундан жуда хурсандмиз.
Фурқат Юсупов
