Йигирма иккинчи миллий чемпионатни жамоамиз "Насаф"га қарши ўйинда 2:2 ҳисобидаги дуранг билан бошлаганди. Мавсум якунида ҳам бу икки жамоа ўртасидаги баҳс ҳам 2:2 ҳисобида якун топди.
Ўйин ҳар томонлама қизиқарли ва шиддатли тарзда ўтди. Жамоамиз бутун ўйин давомида рақибни мағлуб этиш учун ҳаракатда бўлди. Ўйинда хавфли вазиятлар кўплиги жанговор дурангда ҳам акс этиб турибди.
"Олмалиқ" бу йил ўз олдига олтинчи ўринни эгаллашни мақсад этиб қўйганди. Футболчиларнинг ҳамжиҳатликда ҳаракат қилиши, мураббийларнинг тинимсиз изланишлари ва якунда бир жамоа бўлиб жамланишлари ўз натижасини берди. Жамоа мавсумни бешинчи ўринда якунлади.
Умид қиламизки, кейинги мавсумда жамоа ўз таркибини янада кучайтирган ҳолда чемпионат медаллари учун курашга қўшилади.
