Пахтакор" жамоаси фахрийлари Бокуда "Нефтчи" меҳмони бўлишди.

Апрель ойида Тошкентда бўлиб ўтган беллашувда 4:4 ҳисоби қайд этилганди. Шу сабабли "Нефтчи" жамоаси фахрийлари "Пахтакор" фахрийларини жавоб ўйини учун таклиф қилишди. Бокуда янги бунёд этилган "Марказий" стадионда яқин ўтмишнинг юлдузлари майдонга тушишди.

Баҳсда "Пахтакор" қуйидаги таркибда ҳаракат қилди: Анвар Рашидов, Биродар Абдураимов, Тўлаган Исоқов, Мустафо Билолов, Геннадий Денисов, Игорь Шквирин, Азамат Абдураимов, Улуғбек Рўзимов, Андрей Микляев, Мурод Алиев, Шуҳрат Раҳмонқулов, Рустам Дўрмонов, Ёрқин Назаров, Бахтиёр Ашурматов, Равшан Бозоров.

Маъмур: Александр Сидоров.

Бош мураббий ва делегация бошлиғи: Григорий Цейтлин.

Кескин курашлар остида ўтган учрашувнинг биринчи бўлимида ҳисоб очилмади. Иккинчи бўлимда Рустам Дўрмонов дарвозабондан қайтган тўпни мезбонлар дарвозасига жойлаб қўйди. Кейин эса мезбонлар 2 тўп киритиб, олдинга чиқиб олишди. Лекин характер намойиш қилган фахрийларимиз сўнгги дақиқаларда Азамат Абдураимовнинг аниқ зарбаси эвазига мағлубиятдан қутулиб қолишди. Шу тариқа ўйин 2:2 ҳисобида якунланди. Мезбонлар сафида Вели Касумов, фахрийларимиздан Анвар Рашидов ва Мурод Алиевнинг ҳаракатлари кўпчиликда илиқ таассурот қолдирди. Жамоамизнинг Бокуга ташрифи доирасида Озарбайжоннинг Ўзбекистондаги фавқулодда ва мухтор элчиси Гусейн Гулиев ташкилий масалаларда катта ёрдам берди. Фахрийлар ўртасидаги бундай беллашувлар икки қардош халқ ўртасидаги дўстона муносабатларни янада ривожлантиришда муҳим ўрин тутади. Умид қиламизки, шу каби учрашувларни ўтказиш анъанага айланади.