Ўзбекистонлик мутахассис Астана шаҳрига учиб борди ва бугуннинг ўзида (28 ноябрь) "Астана" клуби бош мураббийига айланди. Бу ҳақда клуб расмий сайти хабар тарқатди.

Расмий сайт бу ҳақда эълон тарқатар экан, Абрамовнинг фаолиятига ҳам қисқача тўхталиб ўтган.

Вадим Карленович мураббийлик фаолиятини Фарғонанинг  «Нефтчи» жамоасида ёрдамчи мураббий сифатида бошлаган. Кейинчалик у «НБУ-Осиё», «Трактор», «Локомотив» клубларини, шунингдек, Ўзбекистон олимпия ва миллий терма жамоаларини бошқарган.

23 ёшгача бўлган футболчилардан иборат олимпия терма жамоаси билан у икки марта Вьетнам футбол федерацияси кубоги халқаро мусобақасида ғолиб чиққан. Икки марта олимпия терма жамоасни Пекин ва Лондон олимпиадалари саралашининг сўнгги босқичига олиб чиққан.

Миллий терма жамоани бошқариш даврида эса Вадим Абрамов Осиё кубогида 4-ўринни эгаллаган. ЖЧ-2014 саралаш босқичида эса ҳал қилувчи гуруҳ босқичигача етиб келган.