Айни пайтда «Навбаҳор» жамоаси аъзолари мавсум чарчоқларини чиқаришаётган бўлсада, клуб раҳбарлари ва мураббийлар янги мавсумга ҳозирлик ишларини бошлаб юборишган.

Навбатдаги йилги мавсумда “Навбаҳор”нинг аввалги мақеини тиклаш учун ҳаракат қилинишини эътироф этиш жоиз. Зеро навбатдаги чемпионат арафасида фойдаланишга топширилиши кутилаётган муҳташам “Навбаҳор” ўйингоҳи яна мухлислар билан тўлиб тошади. Клубимиз мутасаддилари ҳам ишқибозлар ишончини оқлаш учун ҳаракат қилишмоқда. Жамоа янги мавсумга тайёргарликни 20 декабрь санасида бошлайди.

Якунига етган чемпионатнинг сўнгги қисмида “Навбаҳор”да маслаҳатчи мураббий сифатида ишлаган Нўъмон Ҳасанов куни-кеча Наманганда бўлиб, кейинги режалар хусусида клуб раҳбарлари билан учрашди. Ҳозирда таркибни кучайтириш ва рақобатбардош жамоани шакллантириш мақсадида бир қатор футболчилар билан музокаралар олиб борилмоқда. Яқин орада келгуси мавсумда “Навбаҳор” шарафини ҳимоя қилиши мумкин бўлган янги ўйинчиларнинг номи ҳам маълум бўлади.