Vesti.kz сайти мухбири Вадим Абрамовнинг "Астана" клубида қай даражада муваффақиятли ишлаб кетиши мумкинлигини таҳлил қилиб кўрди. Ушбу материал билан танишамиз.

"Вадим Абрамовнинг "Астана" бош мураббийлигига тайинланиши очиғи ҳайрон қолдирди. Яна ҳайрон қоларли томони шундаки, ўзбекистонлик мутахассисликнинг биографиясини ҳеч ким ўрганмаяпти. Vesti.kz сайти мухбири Абрамовнинг "Астана"да қанчалик муваффақиятли ишлаб кетишини таҳлил қилади ва шу билан биргаликда бунга шубҳа билан қарайди.

Бу қанақаси бўлди, ҳам ишонч беради, ҳам уни қайтариб олади? Худди болалар туйғусига ўхшайди. Дейлик, бизга ўйинчоқ ваъда қилишди. Куни билан деразанинг ёнида ўтириб, ота-онанинг келишини пойлайсан. Якунда эса ўйинчоқ у қадар зўр бўлиб чиқмайди. Вадим Абрамов билан ҳам шунга ўхшаш ҳолат юзага келяпти. Менимча, кўпчилик Луи Ван Гал Астанага келишини эшитганидан кейин хурсандчилигидан осмонга сакраганди. Ахир клуб президентга қарашли-ку! Нега келмаслиги керак? Қандайдир юлдуз футболчи келиши ҳам мумкин эди. Энди ўзбек мутахассиси ўзига яхши таниш бўлган футболчилар хизматидан фойдаланмаслигини маълум қилди. Бу эса жиннилик. Мен қўшни мамлакат футболчилари ёмон деган фикрни илгари сурмоқчи эмасман. Йўқ. Шунчаки Қозоғистон пойтахти жамоасининг ривожланиш концепциясидан ўзбек футболчиларига боғланиб қолиш жиҳати ўрин олмаган.

"Астана"нинг аввалги бош мураббийи клубни янги даражага қай тарзда олиб чиқишни аниқ биларди. Руминиялик мутахассиснинг исботлаши керак бўлган нарсаси қолмаганди. Маҳорат, футболчиларни руҳлантира олиш қобилияти, қизиқарли машғулот жараёни, натижа — буларнинг барчаси Андонега боғлиқ ҳолатлар. Йоан билан янги шартнома имзоланиши кутилган бўлса-да, бу ҳолат амалга ошмади. Луи Ван Гал келмади, Славолюб Муслин ҳам тўғри келарди. Мухлислар ва ҳамкасб-журналистларнинг Абрамовга нисбатан муносабати эса эҳтиёткор ва ҳайратли. Ушбу мураббий яқиндагина аввал "Актобе"ни, кейин терма жамоани бошқариши мумкин эди. Яхшиямки, унга терма жамоани топширишмади, акс ҳолда мухлисларнинг танқидларини тўхтатиб бўлмасди. Бундан келиб чиқадики, мураббийнинг агентлари қозоқ футболига таъсири катта инсонлар экан. Улар вакант жойлар юзага келиши билан матбуотда мураббийнинг номини  тез-тез тилга олинишига сабаб бўлдилар.

Ниҳоят, у келди ва биз билан танишди. Вадим Карленович Европа футболида "пишмаган". У эса тартибсиз Осиёдан келди. У ерда эса гол бўлган пенальти 3 мартадан қайта тепилиши, футболчилар ва мухлислар майдонда тартибсизлик келтириб чиқариши, ўйинлар бошланиш вақти эса бир куннинг ўзида бир неча маротаба ўзгариши мумкин. Бунинг ижобий жиҳатлари ҳам бор. Агар клуб менежментида камчиликлар мавжуд бўлса, Абрамов буни оддий қабул қилиши мумкин. Қозоғистон эса ҳали Осиё касалликларидан тўлиқ соғайиб кетгани йўқ. Соғайиб кетиш учун энди ҳаракатлар қилинмоқда.

Биринчи навбатда, ўзбек мутахассиси асосий эътиборни ярим ҳимоя чизиғига қаратади ва айнан шу ҳудудда жиддий тозалаш ишларини олиб бориши кутилмоқда. "Менга ярим ҳимоя чизиғингни кўрсат, жамоанг қандай эканини айтаман", - дея гапиришни яхши кўради Ўзбекистон миллий терма жамоасининг собиқ бош мураббийи. У ўз шогирдларини руҳлантира олади, улардан бор куч билан ҳаракатланишни талаб қилади. Лекин бу нарса ҳар доим ҳам амалга ошавермайди. Умуман олганда, у терма жамоалар мураббийи. У қўшни давлатнинг турли терма жамоаларини бошқариб, ўзига хос обрў қозонган. Умуман, у яхши ҳам эмас, ёмон ҳам эмас, ўртамиёна.

"Астана" клуби ўйини оддий ва мураббийлар штаби эса тез-тез ўзгариб туради. Бу жамоага яхши ижрочилар йиғилган, кўпчилик футболчилар техник жиҳатдан кучли. Бу эса жамоанинг Премьер-лигада ўйнашига ёрдам бермоқда. Агар Абрамов унинг ўйинига ўзининг янги, биз аввал кўрмаган жиҳатини қўшса, бундан мағрурланиши мумкин. Қозоғистонда. Европада эса Абрамовнинг маҳорати камлик қилиши мумкин. У кўпроқ руҳшунос-мураббий бўлса-да, жамоада уни қандай қабул қилишади, ҳали бирор нарса дейиш қийин.

Мураббийнинг ўзгариши клубнинг бутун ҳаётини ўзгартириб юбориши мумкин. Умуман олганда, бу таваккал иш. Жаҳондаги ҳар қандай жамоадаги мураббийнинг ўзгариши билан жамоанинг муваффақиятли ўйнаб кетишини олдиндан айтиб бериш мумкин эмас. Барча мураббийлар ўзларининг ижобий ва салбий жиҳатларига эга. Президентнинг спорт клуби машҳур мураббийни таклиф қилиши мумкин эди (бундай имкониятга эга), лекин бундай қилмади. Мураббий танланди. Энди фақат кутиш қолди: совринлар ёки тез орада истеъфо?