Бугун ўзлигимдан бутунлай четлашган ҳолда мухлислар, ўша ҳеч ким эшитмайдиган мухлислар номидан гапирмоқчиман…
Андрей Аршавин нима учун терма жамоада ўйнамаяпти деб ўйлайсиз? Яхши ўйнолмаяпти дейсизми? Йўқ адашасиз. У ҳамон бинойигина етакчи бўла олади. Аммо футболдаги энг муҳим омил бўлган МУХЛИСЛАР сабаб у терма жамоада ўйнай олмайди. Европа чемпионатидан кейин унинг нима дегани эсигнизда: “Мулислар хафа бўлишса ўзларига…”. Бундан ғазабга тушган мухлислар ёппасига бош кўтариб бунақа киборларнинг бизга керак эмас деб топишди. Ғарб футболининг энг катта ютуқларидан бири бу мухлсилар фикрининг дур-у гавҳарга тенг эканлигидадир. Биздачи? Биз – мухлисларни ким эшитади? Ҳеч ким. Ҳеч ким. Яна бир маротаба ҳеч ким!!! Бизда футболимиз раҳнамолари стадионларни тўлдириш учун “ёниб-куйишади”, лекин стадионлар нима учун бўш деб ўйлаб кўришмайди. 2000 йилларда эслайман стадионлар мухлислар билан тўлиб тошарди. Терма жамоа ўйинлари байрам каби қаршиланарди. Ахир бугунгача мухлислар қай даражада кўпайганини билиш учун математикадан 1-синф билимига эга бўлиш кифояку. Нега унда стадионларимиз тўлмайди? Сабаб оддий. Мухлисларнинг футболдан кўнгли қолди. Улар чарчашди. Эшитилмасликдан чарчашди. Уларнинг фикри ҳеч қандай аҳамиятга эга эмаслигидан чарчашди. Қани айтингчи, орамизда Иордания билан ўйинлардан кейин терма жамоани сўккан, лекин уйига бориб ҳеч кимга кўрсатмай йиғлаганлар йўқми? Бор, минглаб, ҳаттоки миллионлар топилади бундай мухлислар. Мухлис куйганидан гапиради, аламидан сўкинади. Эрон билан ЖАРдаги ўйинни эслайсиза? Ўша кунларда ҳаво жуда ҳам иссиқ, чидаб бўлмас даражада эди. Худди ҳозиргидай эсимда бир отахон (Хоразм шевасида сўзлаганди) чипта кута-кута қуёшда қайнаб кетганди. Охири отахон бўлмаган чиптага навбатдан чиқиб “Э ўлсин футболи ҳам” деганди. Қулоғим остида шу сўз ҳамон жаранглайди. Ёши катта, иссиқ ҳавода соя-салқинда ётиши керак бўлган отахон қуёшда кабоб бўлсаю, ёш, қирчиллама чиптачи йигитлар салқинда кола ичиб ўтирса, бу қайси меъёрга тўғри келади? Бунинг устига чипта муаммоси. Бу ҳақда роса гапирилди, чайнашнинг ҳожати йўқ. Шу ўринда Абдулла Қаҳҳорнинг “Ўғри” ҳикоясига қандай усталик билан эпиграф танлаганига қойил қоласан киши. Гапни жуда узоқдан олиб келдим. Мақсадим бизнинг мухлислар футболимиз учун жонини беришга тайёр эканига сизни ишонтирмоқчиман. Бутун дунё ҳавас қилса, арзигулик мухлисларимиз бор эканини эслатиб қўймоқчиман. Сайтдаги хабарларга қолдирилган изоҳларни ўқиб, аҳволимизга ачиниб кетдим. Келинг улардан баъзиларини айнан келтирсам: “Футболга кизикмаган инсонларга хавасим келади. Узимга эса ачинаман. Шу хабарни укиб футболимизга ачинаман. Денгизга чукиб кетган кемага ухшийди футболимиз. Афсус”. (Latsio), “Komada yotgan o'zbek futbolini bugun joni uzilibdi”. ALVIDO O'ZBEK FUTBOLI (Fanat Madrid), “2018- yilgachon MTJ ga BAYKOT Elon qilaman !!!!!!!!!” (Husanboy), “Sizlarga bir taklif bildirmoqchiman. Kelinglar MTJ o'yiniga tushmelik. Shu orqali Futbolimizda bo'layotgan bugungi kun seriallariga javob bergan bulamiz!!!” (Nasimentu). Энг дахшатлиси, мухлисларнинг кўпчилиги футболимиз ўлганини таъкидлашмоқда. Йўқ, ўзбек футболи ўлмайди. Шунчаки уни ўлдирмоқчи бўлишади. Мухлислар фикри инобатга олинмас экан истеъфо сўраган мураббийлар ўз ўрнида қолаверади, мажлис бошида ҳамма билан хайрлашганлар ҳам ҳеч қаерга кетмайди. Мен кимнингдир қаерга кетиши билан муаммо ҳал бўлади демоқчи эмасман, фақат мухлислардан ҳам “нима дейсан” деб сўралса ёмон бўлмасди.
Мухлислар, елкадошлар сизлага қарата қуйидагиларни айтмоқчиман. Ўзбек футболининг умрбод эканига ишонинг. Ўзбек футболи бу ғалабадан кейин ҳаммани машинасида “катайси” қилдирган, мағлубиятда эса отасидан қолган тошойнани қидирган – МУХЛИСЛАР. Ўзбек футболи бу – биз бир-иккита расминигина кўрган, ўша машҳур оёғида қизил қайиши бор Геннадий Красницки, ўзбек футболи бу – бурчак тўплари худди пенальти каби хавфли бўлган Беродар Абдураимов, ўзбек футболи бу – жарима зарбаси дарвозабонларнинг оёғини қалтиратган футболчи Миржалол, ўзбек футболи бу юзини бутсага тутиб берган Бахтиёр Ашурматов, ўзбек футболи бу “Газовик”да ўртаҳол футболчи бўлса ҳам терма жамаода ғойибона куч билан шеърга айланадиган Санжар Турсунов, ўзбек футболи Хитойга гол уриб бутун стадионни югуриб айланган Ширшов, ўзбек футболи бу “Насаф”нинг бутун Ўзбекистонга танилган барабанчиси ёки бўлмаса Самарқанддаги бозорда арава тортадиган, Фарҳод Тожиевдан олган формасини ҳеч ҳам ечмайдиган “Динамо” мухлиси. Дўстлар, футбол сиз учун, сиз мухлислар учун ўйналади. Илтимос футболчиларимизни ёлғизлатиб қўймайлик. Бир бир жамоамиз. Дунёдаги энг зўр жамоа – ЎЗБЕК ФУТБОЛИ МУХЛИСЛАРИ жамоаси!
Журналист эмас, мухлис Ўткир Жалолхонов
