Бекобод шаҳридаги “Бахт уйи” тантаналар залида аёллар футболи бўйича мамлакат 19-миллий чемпионатида учинчи ўринни эгаллаган “Металлург-W” жамоаси аъзоларига бронза медаллари топшириш маросими бўлиб ўтди.
Ўзининг дебютидаёқ чиройли ўйинлари билан бекободлик футбол ишқибозлари қалбини забт этган, ҳужумкор ўйинлари билан рақибларини шошириб қўйган бекободликлар чин маънода мавсум кашфиётлари бўлишди десак муболаға қилмаган бўламиз.
Шерали Бобоқулов бошчилигидаги “Металлург” қизлари 2013 йилги мавсумда фақатгина мамлакат чемпиони – Қаршининг “Севинч” жамоасига ҳар иккала учрашувни бой берди холос. Мамлакатимизнинг яна бир номдор жамоаси “Андижанка” билан илк учрашув Бекободда ўтказилган бўлса-да, тажриба камлиги боис ўйин охирида гол ўтказиб юборган кончилар якунда мағлубият аламини тотиб кўришганди. Мавсум сўнгида Андижонда бўлиб ўтган жавоб учрашувида “Металлург” дуранг ўйнади ва ҳақли равишда медаллардан бирига даъвогарлик қилаётганини исботлади. Бронза медали учун асосий рақибалари “Машъал”, “Шўртан” жамоалари билан ўйинларда эса торозу палласи бекободликлар томонида бўлди. Чемпионатдаги 19 учрашувнинг 12 тасини Ш.Бобоқулов шогирдлари ғалаба билан якунлашган бўлишса, 3 ўйинда очколарни баҳам кўришди. 4 ўйинда эса имконият бой берилди. Киритилган ва ўтказиб юборилган тўплар фарқи 28-13, “Металлург” жамоаси фойдасига.
Жамоанинг биринчи мавсумдаёқ бронза медалига сазовор бўлишида дарвозабон Юлия Аҳмедованинг хизматлари катта бўлганлигини алоҳида таъкидлаб ўтиш лозим.. Дарвозабон ярим жамоа деб бежизга айтмасликларини Юлия исботлади. “Металлург” лигада тўп ўтказиб юбориш борасида энг яхши 3 жамоа сафида эканлиги фикримиз далилидир. Аҳмедовадан ташқари асосий оғирликни ўз зиммаларига олишган тажрибали футболчилар – Альбина Белялова, Нилуфар Абдуллаевалар ёнида кўплаб иқтидорли қизлар кашф этилди. Опа-сингил Ўғилой ва Садоқат Илашевалар, Холида Дадабоева, Насиба Ҳожиева, Мая Назарова, Ораста Тожибоева, Нодира Мўйдинова, Моҳигул Икромова, Нозима Камолтоева, Умида Худойбоқова, Лутфинисо Ҳамидова, Маҳлиё Холматова, Гулшан Шодиева, Нигора Маматқуловалар жамоанинг муваффақиятига ўзларининг муносиб улушини қўшишди.
Чемпионатнинг бронза медалларини топшириш маросимида Ўзбекистон аёллар футбол ассоциацияси вице-президенти Рустам Холиқов иштирок этди. “Металлург” қизларига чемпионатдаги муваффақиятли иштирокдари учун Бекобод металлургия заводи раҳбарияти томонидан қимматбаҳо совғалар ҳам топширилди. Совғаларни завод бош муҳандиси Айрат Ҳасанов бошчилигидаги масъул ходимлар жамоа аъзолари ҳамда раҳбарият вакилларига тақдим этдилар.
