Жаҳон теннис рейтинги етакчиси, испаниялик Рафаэль Надаль ўзининг Профессионал теннисчилар ассоциацияси мусобақаларидаги 61-совринини ютиб олди.

Қатар пойтахти Доҳада бўлиб ўтган турнир финалида у франциялик Гаэль Монфисни мағлубиятга учратган. Мусобақада биринчи рақам остида курашга киришган испаниялик бунинг учун финалда учта партия ўйнашга мажбур бўлди.

Биринчи сетда Монфис 1:6 ҳисобида бой бериб, иккинчисини тай-брейкларда ўз фойдасига ҳал қилди. Шундай бўлсада, катта тажриба эгаси ҳисобланган Надаль вазиятни қўлга ола билди ва сўнгги партияни ўз фойдасига ҳал қилди. Икки соат давом этган матч 6:1, 6:7 (5:7), 6:2 ҳисобида испанияликнинг ғалабаси билан тугади.

Мукофот жамғармаси 1 миллион доллардан зиёд бўлган Доҳа турнирида Надаль 188,6 минг, Монфис эса қарийб 100 минг ишлаб олган.