2006 йили Германияда бўлиб ўтган футбол бўйича жаҳон чемпионати баҳсларига Ўзбекистондан велосипедда борган марғилонлик Акрам Маъруфжонов Бразилияга боради. Машҳур велосипедчининг режалари ҳақида ЎФФ матбуот котиби Санжар Ризаев 20 январь куни маълум қилди.
Хабар беришларича, Маъруфжонов ЎФФ матбуот хизмати меҳмони бўлиб ва Бразилиядаги жаҳон чемпионати баҳсларига велосипедда бориш режалари билан ўртоқлашган. Марғилонлик 60 ёшдан ошган велосипедчи бунгача Германияда ташкил этилган футбол бўйича 2006 йилги жаҳон чемпионати баҳсларига ҳам велосипедда борган эди.
Маълумот учун, 2008 йили Маъруфжонов Германия терма жамоаси ва Мюнхеннинг “Бавария” клуби собиқ дарвозабони Оливер Каннинг хайрлашув учрашувида иштирок этиб, унга зарбоф тўн ва дўппи кийдирган, невараси учун эса Каннинг дастхати туширилган клуб либосини эсдалик сифатида қабул қилган.
Футбол бўйича 2014 йилги жаҳон чемпионати баҳслари 12 июнь – 13 июль кунлари Бразилиянинг 12 шаҳрида бўлиб ўтади.
