Хабарингиз бор, Қаршининг «Насаф» жамоаси шу кунларда Туркиянинг Анталия шаҳрида 8 февраль куни ўтказиладиган ОЧЛ «плей-офф» ўйинига тайёргарлик кўряпти. Ўзбекистон чемпионати бронза медали совриндори йиғиндан ўрин олган илк назорат ўйинини Албаниянинг «Кукеси» клубига қарши ўтказиб, Алишер Юсупов ва Фаррух Сайфиевнинг голлари эвазига 2:1 ҳисобида ғалаба қозонди. Иккинчи назорат ўйинида Қозоғистоннинг «Шахтёр» клуби ҳам худди шу ҳисобда таслим этилди. Бу ўйинда жамоанинг янги аъзоси Игорь Таран ўзини кўрсатди. Биз қарағандаликларга қарши кечган ўйиндан сўнг «Насаф» ярим ҳимоячиси Эркин Бойдуллаев билан боғланиб, улардан қисқача интервью олдик.

— Туркия йиғини кўнгилдагидек давом этмоқда, — дея сўз бошлади футболчи. — Кунига икки маҳалдан машғулот ўтказяпмиз. Шароитлар юқори даражада. Футболчиларнинг кайфияти ҳам аъло. Йиғиндан ўрин олган илк назорат учрашувини Албания вице-чемпионига қарши ўтказдик. Бу клуб вақтида еврокубокларда ўйнаган экан. Ўйинда майдоннинг ҳар бир қарич ери учун кураш кечди. «Кукеси» таркибида жисмонан бақувват, бўйдор футболчилар кўпчиликни ташкил қилишаркан. Шундай бўлсада, ўйинни ўз фойдамизга ҳал этдик.

— Европа ва Осиё футболи тўқнашувида қандай тафовут кўзга ташланди?
— Жисмоний тайёргарлик ва тезлик борасида албанияликлар устунлик қилишди. Ўйлаш учун фурсат ҳам беришмади. Биз эса тезкор узатмалар ва тўпни назорат қилиш бобида яхшироқ кўриндик.

— «Шахтёр» билан ўйин ҳақида нима дея оласиз?
— Бу клубга вақтида «Насаф» ва «Машъал» жамоаларини бошқарган Виктор Кумиков устозлик қиляпти. «Шахтёр» ўтган йили ЕЧЛ ва ЕЛда муваффақиятли иштирок этганди. Тенг курашлар остида кечган учрашувда яна 2:1 ҳисобида зафар қучдик. Қарағандаликлар таркибида кучли легионерлар ҳаракат қилишди. Бу ўйин ҳар икки жамоа учун фойдали бўлди.

— ОЧЛ «плей-офф» босқичида «Ал-Жаиш» билан ўйнайсизлар. Машғулотлар билан параллель равишда рақибни ўрганиш жараёни ҳам давом этаётгандир...
— Маълумот бериб бориш­япти. Қатар клуби таркибида ҳам кучли легионерлар бор. Жамоа шунинг ҳисобига кучли бўлса керак.

— Умуман, «Ал-Жаиш» иштирокидаги ўйинларни кўрдингларми?
— Ҳали йўқ. Лекин 8 февралгача вақт бор. Унгача камида 3-4та ўйинини таҳлил қиламиз. Бусиз иложи йўқ.

— Ўзингиз айтганингиздек, Қатар клубида легионерлар асосий ролдалар. Бу ҳолат сизларни хавотирга солмаяптими?
— Тўғри, «Жаиш» кучли жамоа. Таркибида 6-7 нафар легионер ўйнайди. Лекин биз ўз вазифамизни 100 фоизга бажаришимиз керак. Барчамиз бир бўлиб, майдондан бошимизни тик кўтарганча чиқиб кетишимизга ишонаман.

— Ўтган мавсум чемпион бўлишинглар ҳам мумкин эди. Сизнингча, «олтин» учун курашда «Насаф»га қайси ўйин панд берди?
— Бекободдагиси. Ўзбекистон кубоги финалидан кейинги руҳий тушкунлик ҳолати ўз таъсирини кўрсатди, деб ўйлайман. Ўтган мавсумдан тегишли хулосалар чиқардик. Бу йил ўзимиз иштирок этадиган барча мусобақаларда максимал натижа учун курашамиз. Ҳозир биринчи галдаги вазифамиз — ОЧЛнинг «плей-офф» ўйинларидан муваффақиятли ўтиб, гуруҳ босқичига чиқиш.