Буюк Британиянинг машҳур “Кардифф Сити” жамоаси Қозоғистон ва Ўзбекистонда фарм-клубини очишни режалаштириб турибди.
1899 йил ташкил топган мазкур жамоага малайзиялик Винсент Тан раҳбарлик қилаётганидан мухлисларнинг хабари бор. Қолаверса, “Манчестер Юнайтед”даги ўйинлари орқали “кулиб турган жаллод” лақабини олган норвегиялик суперҳужумчи Уле Гуннар Сульшер Уэльс жамоасига бош мураббийлик қилаётгани ҳам янгилик эмас. Хўш,“Кардифф Сити”ни Марказий Осиёда фарм-клуб очишига нима туртки бўлмоқда? Аслида бу миш-мишлар қаердан чиқди? Суриштирувларимиздан сўнг маълум бўлдики, биринчи лига вакили “Оқ-тепа” жамоаси президенти Сарвар Шоғуломов, клуб қошидаги футбол мактаби директори Владимир Гаврилов билан бирга бир ҳафта муқаддам шу масала юзасидан Қозоғистонга борган ва музокара ўтказиб қайтган. Табиийки, биз ўз олдига жиддий мақсадларни қўяётган клуб президентини суҳбатга тортдик.
- Сарвар Ғанишерович, Қозоғистонга уюштирилган сафардан кўзланган асосий мақсад нима эди?
- Бир ҳафта муқаддам жамоамиз қошида ташкил қилинган футбол мактаби директори Владимир Гаврилов билан қўшни Қозоғистонга бориб келдик. У ерда тўрт кун бўлиб, бир қатор масалалар юзасидан музокаралар ўтказиб қайтдик. Хусусан, “Кардифф Сити”да спорт директори лавозимида фаолият олиб бораётган дўстим Алишер Апсаламов учрашиб, суҳбатлашдик.
- Ўзаро суҳбатда қандай масалаларни ўртага ташладинглар? Буюк Британиянинг машҳур “Кардифф Сити” жамоаси юртимизда фарм-клубини очиши қанчалик ҳақиқатга яқин? Бунга сизнинг алоқангиз борми?
- Албатта бунга алоқам бор. Алишер билан Марказий Осиёда футболни ривожлантириш борасида суҳбатлашдик. Нималар қилсак, минтақамизда миллионлар ўйини янада ривожланиши ҳақида мулоҳаза юритдик. Охирги қароримиз шу бўлдики, насиб қилса, “Кардифф Сити” қўшни Қозоғистон ва Ўзбекистонда ўз фарм-клубини очади.
- Бу фикр кимдан чиқди?
- Мендан. Очиғи, беш ойдан буён шу ҳақида ўйлаб юргандим. Алишер билан фикримиз бир жойдан чиқди.
- Фарм-клуб қачон очилади?
- Айни вақтда ҳужжат ишлари олиб борилмоқда. Яъни, юртимизда фарм-клуб очиш учун нималар кераклиги борасида ишлаяпмиз. Бу ишларнинг барчаси ижобий якунлангач, “Кардифф Сити”нинг фарм-клуби юртимизда ўз фаолиятини бошлайди.
- Фарм-клубнинг иш жараёни қандай кечади? Шу ҳақида ҳам маълумот бера оласизми?
- Ҳамма жамоаларнинг фарм-клубларига ўхшаб, барча нарсалар “Кардифф Сити”га тегишли бўлади. Улар юртимиздаги фарм-клубни молиявий томондан ва форма, эпикировка билан таъминлайди. Оддий қилиб айтганда, “Кардифф Сити”нинг юртимиздаги жамоаси ташкил қилинади. Биз бу жамоани Ўзбекистондаги ташкилий ишлари билан шуғулланамиз.
- “Кардифф Сити”нинг фарм-клуби ташкил қилинганидан сўнг, олий ёки биринчи лига баҳсларида иштирок этадими? Худди ўзимизнинг “Пахтакор”, “Бунёдкор” ва “Машъал” жамоаларининг фарм-клублари сингари.
- Буёғини фарм-клуб фаолиятини бошлаганида ҳал қиламиз. Қонуний томондан бунга имкон бўлса, жамоани Ўзбекистон чемпионати баҳсларида иштирок этишини таъминлашимиз мумкин. Лекин ҳозир бу ҳақида эмас, балки ташкилий масалалар тўғрисида бош қотиряпмиз.
- Уэльс жамоаси юртимизда фарм-клуб очгани учун нимага эга бўлади?
- Биз футболчиларни маълум ёшгача шуғуллантириб, тарбиялаб берамиз. Англиядаги бош жамоа қайси футболчини маъқул топса, ўшани “Кардифф Сити”га олиб кетади.
- Фарм-клуб фаолиятини бошласа, “Оқ-тепа”нинг тақдири қандай кечади?
- Одатдагидек. “Оқ-тепа” бизнинг жамоа. Унинг молиявий, ташкилий ишлари бизнинг зиммамизда. “Кардифф Сити”нинг фарм-клуби очилиши “Оқ-тепа”нинг фаолиятига ҳеч қандай таъсир ўтказмайди.
- Қозоғистонга уюштирган сафарингиз чоғида “Қайрат” ва “Остона” жамоалари раҳбарлари билан учрашганингиз ҳақида эшитдик.
- Тўғри. Ҳақиқатдан ҳам сафар давомида мазкур икки клуб расмийлари билан учрашдик. Улар билан ўрнатган алоқамизни янада мустаҳкамладик.
- Ўзаро қандайдир режалар тузилмадими?
- Уларга “Оқ-тепа” ҳақида, ўтган йилдан фаолиятини бошлаган базамиз тўғрисида гапириб бердик. Қозоғистонлик ҳамкасбларимизни юртимизга, хусусан, базамизга таклиф қилдик. Жамоалар ўртасида ўртоқлик учрашуви ташкил қилишни ва футболчиларни тажриба алмашиш учун жўнатишни режалаштирдик.
- Сир бўлмаса, ўртоқлик ўйини қачон ўтказилади?
- Бу сир эмаску, аммо муддати ҳали аниқмас. Сабаби, ҳали иккала давлатда ҳам миллий чемпионат баҳслари старт олгани йўқ. Мавсумга кўрилаётган тайёргарлик давомида бунга ҳам ойдинлик киритамиз.
Маълумот ўрнида: Қозоғистонлик 24 ёшли Алишер Апсаламов 2013 йилнинг октябрь ойидан бошлаб, “Кардифф Сити”да менежер лавозимида иш бошлаган эди. Аммо виза муаммолари туфайли декабрь ойида ишдан кетди. Ҳужжат ишлари ижобий тарзда ҳал этилгач, Алишер энди спорт директори сифатида иш бошлади. Айтиб ўтиш керак, Апсаламов жамоа раҳбари Винсент Таннинг ўғли билан яқин дўст. Табиийки, қозоғистонлик ёш мутахассис клубда иш бошлашида Таннинг ўғлини ҳиссаси катта.
Фурқатбек Нишонов суҳбатлашди.
