30 январь куни Қашқадарёда ҳоким Кубогининг навбатдаги мусобақасига якун ясалди. Ярим финалда “Бинокор”га мағлуб бўлиб, учинчи ўрин учун курашда “Насаф-2” билан беллашган “Машъал-1” бу сафар ғалабага эришди.

Ўйинда дастлаб қаршиликлар ҳисобни очишди. Кейин “Машъал-1”дан Юнус Очилдиев ҳисобни тенглаштирди. Орадан кўп ўтмай, Очилдиев жароҳат олган ҳолда майдонни тарк этди. Иккинчи бўлимда муборакликлар ҳисобда олдинга чиқиб олишди. Бу сафар Шохруҳ Достонов рақиб дарвозасига гол урди. Лекин ўйин тугашига саноқли дақиқалар қолганда “Насаф” ўйинчилари ҳам тўп киритиб, ҳисобни 2:2 кўринишга келтиришди.

Натижада ғолибни аниқлаш 15 дақиқалик қўшимча таймларга қолди. Бироқ кейинги 30 дақиқада ҳам дарвозаларга бошқа тўп киритилмади. Кейин эса навбат пенальтилар сериясига етиб келди. Бунда омад “Машъал” вакиллари томонида бўлиб, жамоамиз 5:4 ҳисобида зафар қучди. Шундай қилиб “Машъал-1” мазкур мусобақада учинчи ўринни қўлга киритди.

Финал ўйинида эса “Насаф-1” ва “Бинокор” жамоалари ўзаро тўқнаш келиб, бунда “Насаф-1” рақибини 2:1 ҳисобида мағлуб этган ҳолда биринчи ўринга сазовор бўлди.