Андижон олимпия захиралари коллежи манежида эркаклар ва қизлар ўртасида индор-хоккей бўйича Ўзбекистон чемпионати бўлиб ўтди. «Андижоннома» газетаси хабарига кўра, унда саккиз жамоа иштирок этиб, ғолиблик учун ўзаро баҳс олиб борди.

Андижон ихтисослашган олимпия захиралари болалар ва ўсмирлар спорт мактаби (ИОЗБЎСМ) Руслан Сотликов қўл остидаги ёш хоккейчилари Самарқанд, Фарғона, Андижон, АОЗК, Асака спорт коллежи, Наманган, Хоразм вилоятлари жамоалари билан учрашувда турли ҳисобларда ғалаба қозониб, 21 очко жамғарган ҳолда турнир жадвалида пешқадамлик қилди.

Посбон Марсел Асқаров етти ўйинда ўз дарвозасидан атиги 3 тўп ўтказиб юбориб, энг яхши қўриқчи, деб топилса, Илҳом Султонов рақиб дарвозасини 12 бор ишғол этиб, тўпурарлар орасида юқори натижани қайд этди. Пешқадамдан атиги уч очко кам жамғарган «Андижон» клуби иккинчи, АОЗК 15 очкога эга бўлиб, учинчи ўрин соҳиби бўлди.

Қизлар учрашуви ҳам кескин ва қизиқарли курашлар остида ўтди. Унда ИОЗБЎСМ жамоаси фарғоналикларни 1:0, урганчлик тенгқурларини 1:0, «Учқўр-ғон-Ҳумо» (Наманган вилояти) хоккейчиларини 2:0 ҳисобида мағлубиятга учратиб, бухороликларга 0:2, самарқандлик рақибларига 1:2 ҳисобида имкониятни бой берди. 15 имкониятдан 9 очко олган ИОЗБЎСМ Самарқанд ва Бухоро жамоаларидан сўнг турнир жадвалида учинчи ўринни эгаллади.