"Манчестер Сити" Англия Лига кубоги финалида иродали ғалабага эришди ва учинчи марта совринни ўз музейига олиб кетадиган бўлди.

Кутилмаганда, ўйиннинг 10-дақиқасида "Сандерленд" ҳисобни очди. Фернандиньо ўз жарима майдончаси яқинида тўпни Ларссонга олдириб қўйди. У тўпни дарвозабон майдончасига ўнг қанотдан яқинлашган Боринига узатди. Компани позиция танлашди адашди ва тўпни ўтказиб юборди. Италиялик футболчи дарвозабон Пантилимон билан юирга-бир вазиятга чиқди ва дарвозанинг олис бурчагини нишонга олди.

Бўлимнинг иккинчи ярмида биринчисига нисбатан қизиқарлироқ ўтди. Томонлар бир нечтадан қулай имкониятларга эга бўлишди. Бироқ ҳозирча "қора мушуклар" кичик ҳисобда олдиндан боришмоқда.

Иккинчи бўлимни "шаҳарликлар" жуда кучли бошлашди ва ўйин тақдирини 2 дақиқа ичида ҳал қилиб қўйишди.

Яя Туре ўнг қанотда Сабалетага тўпни узатиб, қайта қабул қилиб олди ва дарҳол 30 метрлардан жуда кучли зарба билан ҳисобни тенглаштирди. Тўп ғаройиб траектория орқали дарвозанинг юқори чап бурчагига кириб кетди.

Орадан бир дақиқа ўтиб, Коларов қанотдан олдинга борди ва тўпни жарима майдонига етказиб берди. Ҳаммадан фаол ўйнаган Самир эса ҳисобни 2:1га етказди.

Ушбу голлардан кейин Пеллегрини шогирдлари ўзларини анча эркин ҳис қила бошладилар. "Сандерленд" эса шокка тушиб қолди ва уларнинг ўйини унчалик қовушмади. Боз устига, иккинчи бўлимга қўшиб берилган дақиқаларда "Сити" масалага узил-кесил нуқта қўйди. Яя Туре майдон марказида тўпни эгаллаб олиб, жарима майдончаси остонасигача яқинлашиб борди ва тўпни ўнг қанотдан майдончасига кириб бораётган Навасга узатди. Хесус эса 15 метрлар масофадан дарвозабоннинг оёқлари орасидан ўтказиб, ҳисобни 3:1га етказди.

Шу тариқа, "Манчестер Сити" ўз тарихида учинчи марта Англия Лига кубогини қўлга киритди.

Англия лига, кубоги, Финал
Манчестер Сити – Сандерленд 3:1 (0:1)
Голлар: 0:1 – 10 Борини, 1:1 – 55 Яя Туре, 2:1 – 56 Насри, 3:1 – 90 Навас.
Манчестер Сити – Пантилимон, Сабалета, Демичелис, Компани, Коларов, Яя Туре, Фернандиньо, Сильва (Хави Гарсия, 77), Насри, Агуэро (Навас, 58), Жеко (Негредо, 87).
Сандерленд – Манноне, Бардсли, Браун, Алонсо, О’Ши, Колбэк, Ки Сон Ен, Кэттермоул (Жаккерини, 77), Ларссон (Ст. Флетчер, 60), Жонсон (Гарднер, 60), Борини.
Огоҳлантиришлар: Алонсо (82), Негредо (90).